दोन भाऊ आणि दोन चॅम्पियन कर्णधार! असा रंगणार प्ले ऑफ चा थरार

IPL 2023:सलगपणे तब्बल 52 दिवस चाललेल्या आयपीएल 2023 च्या साखळी फेरीची रविवारी (21 मे) समाप्ती झाली. अखेरच्या सामन्यात गुजरात टायटन्सने आरसीबीला पराभूत केल्याने मुंबई इंडियन्स चौथ्या क्रमांकावर विराजमान झाली व त्यांना प्ले ऑफ्सचे तिकीट मिळाले.त्यामुळे आता प्ले ऑफ्सचे सामने कसे रंगणार हे आपण पाहूया.

मागील वर्षी प्रथमच आयपीएलमध्ये सहभागी होऊन थेट विजेतेपदाला गवसणी घातलेल्या गुजरात टायटन्सने (Gujrat taitens)यावेळी देखील आपली तीच कामगिरी केली. हार्दिक पंड्याच्या नेतृत्वात खेळताना गुजरातने दहा विजय नोंदवत पहिले स्थान काबीज केले. त्यानंतर एमएस धोनी याच्या नेतृत्वातील चेन्नई सुपर किंग्सने मागील वर्षीचे अपयश विसरत, 17 गुणांसह दुसरे स्थान पटकावत क्वालिफायर 1 मध्ये आपली जागा बनवली. आता गुजरात व चेन्नई यांच्या दरम्यान मंगळवारी (23 मे) चेन्नई येथील चेपॉक स्टेडियमवर क्वालिफायर 1 सामना खेळला जाईल. या सामन्यात विजय मिळवणारा संघ थेट अंतिम फेरीत प्रवेश करेल.

गुजरात प्रमाणेच गेल्या वर्षी आयपीएलमध्ये सहभागी झालेल्या लखनऊने आपल्या कामगिरीत सातत्य दाखवले. त्यांनी 17 गुणांसह साखळी फेरी तिसऱ्या स्थानी संपवली. कर्णधार केएल राहुल हंगामाच्या अर्ध्यातून दुखापतग्रस्त होऊन बाहेर झाल्यानंतर कृणाल पंड्याने यशस्वीरित्या संघाचे नेतृत्व करत संघाला सलग दुसऱ्यांदा प्ले ऑफ्ससाठी पात्र केले. खराब सुरुवातीनंतर अखेर काहीशा नशिबाच्या जोरावर रोहित शर्माच्या नेतृत्वातील मुंबई इंडियन्स संघही चौथ्या क्रमांकावर राहत प्ले ऑफ्ससाठी पात्र ठरला. अखेरच्या सामन्यात आरसीबी पराभूत झाल्याने मुंबईला ही संधी मिळाली. लखनऊ व मुंबई यांच्या दरम्यान बुधवारी (24 मे) एलिमिनेटर सामना होईल. हा सामनाही चेन्नई येथे खेळला जाईल.

या सामन्यात पराभूत झालेला संघ थेट बाहेर पडेल. तर विजेत्या संघाला पहिल्या क्वालिफायरमध्ये (Qualify)पराभूत झालेल्या संघाशी खेळावे लागेल. हा क्वालिफायर 2 चा सामना अहमदाबाद येथील नरेंद्र मोदी स्टेडियमवर 26 मे रोजी होईल. तर अंतिम सामना याच मैदानावर 28 मे रोजी रंगणार आहे.