कमाईचे सर्व रेकॉर्ड तोडणार ‘पठाण’ !

ताजी बातमी ऑनलाईन टीम

शाहरुख खानच्या ‘पठाण’ या चित्रपटाची चाहते आतुरतेने वाट पाहत आहेत. किंग खान 4 वर्षानंतर मोठ्या पडद्यावर पुनरागमन करत आहे. अशा परिस्थितीत शाहरुख खानला पडद्यावर पाहण्यासाठी चाहते उत्सुक आहेत. पठाण 25 जानेवारीला थिएटरमध्ये रिलीज होणार आहे, चित्रपटाच्या रिलीजपूर्वी आगाऊ तिकीट बुकिंग सुरू झाली आहे. पठाणने अवघ्या 1 दिवसात जबरदस्त कमाई केली आहे. आगाऊ बुकिंगच्या पहिल्याच दिवशी 2 लाखांहून अधिक तिकिटांची विक्री झाली आहे. ‘पठाण’च्या हिंदी आणि तेलुगू व्हर्जनने सर्वाधिक तिकिटे विकली.

‘पठाण’चे अॅडव्हान्स बुकिंग पाहता शाहरुख खानच्या चित्रपटाला वादांचा फटका बसलेला नाही, असे म्हणता येईल. शाहरुख खानला थिएटरमध्ये पाहण्यासाठी चाहते उत्सुक आहेत. मीडिया रिपोर्ट्सवर विश्वास ठेवला, तर पठाणने रिलीज होण्यापूर्वीच 14.66 कोटी कमावले आहेत. दिल्ली-एनसीआरमध्ये चित्रपटाची आगाऊ बुकिंग 1.79 कोटींहून अधिक झाली आहे. त्याचवेळी मुंबईत 1.74 कोटी रुपयांची आगाऊ तिकिटे आरक्षित झाली आहेत. ‘पठाण’साठी सर्वाधिक आगाऊ बुकिंग बेंगळुरू, हैदराबाद आणि कोलकाता येथे करण्यात आली आहे.

मीडिया रिपोर्ट्सवर विश्वास ठेवला तर पठाणच्या रिलीजच्या दिवशी म्हणजेच पहिल्याच दिवशी किंग खानचा चित्रपट 40 कोटींचा गल्ला जमवू शकतो. त्याचवेळी, पहिल्या वीकेंडला हा चित्रपट भारतात 150 ते 200 कोटींचा आकडा गाठू शकतो, असे मानले जात आहे. त्याच वेळी, वर्ल्ड वाइड चित्रपटाची कमाई 300 कोटींच्या पुढे जाऊ शकते. पठाणपूर्वी, शाहरुख खानच्या मोठ्या ओपनिंग चित्रपटांमध्ये हॅपी न्यू इयरचा समावेश आहे.

शाहरुख खानचा ‘पठाण’ हा चित्रपट बऱ्याच दिवसांपासून चर्चेत आहे. चित्रपटातील बेशरम रंग या गाण्यावरून बराच वाद झाला होता, त्यानंतर सेन्सॉर बोर्डाने चित्रपटात काही बदल करण्याच्या सूचना दिल्या होत्या. पठाण चित्रपटात शाहरुखसोबत दीपिका पादुकोण, जॉन अब्राहम, डिंपल कपाडिया आणि आशुतोष राणा दिसणार आहेत. हा चित्रपट प्रजासत्ताक दिनाच्या एक दिवस आधी म्हणजे 25 जानेवारीला थिएटरमध्ये प्रदर्शित होणार आहे.