गडहिंग्लज :
गडहिंग्लज तालुक्यातील येणेचवंडी गावात रविवारी दुपारी घडलेल्या एका घटनेने संपूर्ण परिसरात मोठी खळबळ उडाली. गावात एका लग्नसोहळ्याची जोरदार तयारी सुरू होती. मंडप सजला होता, पाहुण्यांची गर्दी वाढत होती आणि जेवणावळीची लगबगही सुरू होती. दुपारच्या मुहूर्तासाठी सर्वजण उत्साहात असतानाच अचानक पोलिसांच्या वाहनाचा सायरन ऐकू आला आणि काही क्षणांतच आनंदाच्या वातावरणावर भीतीचे सावट पसरले.
मिळालेल्या माहितीनुसार, संबंधित वधू अल्पवयीन असल्याची गोपनीय माहिती बालविवाह प्रतिबंधक समितीला मिळाली होती. त्यानंतर पोलिस आणि समितीच्या अधिकाऱ्यांनी तत्काळ हालचाल करत थेट लग्नस्थळी धाड टाकली. अचानक पोलिसांना पाहून उपस्थितांमध्ये एकच गोंधळ उडाला. काही पाहुणे काय घडत आहे हे समजून घेण्याचा प्रयत्न करत होते, तर काहींनी मोबाईलवर व्हिडिओ शूटिंग सुरू केले.
दरम्यान, पोलिसांनी वधू आणि तिच्या कुटुंबीयांची चौकशी सुरू केली. कागदपत्रांची तपासणी केल्यानंतर वधूचे वय कायदेशीर मर्यादेपेक्षा कमी असल्याचे स्पष्ट झाल्याची माहिती समोर आली. ही माहिती समजताच मंडपातील वातावरण पूर्णपणे बदलले. काही वेळापूर्वी आनंदात असलेले नातेवाईक आणि पाहुणे अचानक शांत झाले.
स्थानिकांमध्ये अशीही चर्चा होती की परिस्थितीचे गांभीर्य लक्षात आल्यानंतर काहींनी मुलीला दुसरीकडे हलवण्याचा प्रयत्न केला. मात्र पोलिसांनी तत्काळ हालचाल करत परिस्थिती नियंत्रणात घेतली. या कारवाईदरम्यान काही गावकऱ्यांनी आणि उपस्थित मान्यवरांनी “लग्न होऊ द्या, नंतर मुलगी परत घरी पाठवतो,” अशी विनंती केल्याचेही बोलले जात आहे. मात्र अधिकाऱ्यांनी कोणतीही तडजोड न करता कायद्यानुसारच कारवाई केली.
या घटनेनंतर परिसरात बालविवाहाच्या मुद्द्यावर पुन्हा चर्चा सुरू झाली आहे. ग्रामीण भागात अजूनही काही ठिकाणी अल्पवयीन मुलामुलींचे विवाह लपूनछपून लावले जात असल्याचे चित्र समोर येत असल्याची प्रतिक्रिया काही सामाजिक कार्यकर्त्यांनी व्यक्त केली. प्रशासनाने मात्र बालविवाह रोखण्यासाठी आपली मोहीम आणखी कठोर करण्याचे संकेत दिले आहेत.
महिला व बालविकास विभागाकडून या प्रकरणाची पुढील चौकशी सुरू असून संबंधित कुटुंबीयांची माहिती गोळा केली जात आहे. दरम्यान, या घटनेची चर्चा दिवसभर सोशल मीडियावर आणि परिसरात सुरू होती.
