ताजी बातमी ऑनलाईन टीम
विधानपरिषद निवडणुकीच्या पार्श्वभूमीवर राज्यात राजकीय घडामोडींना चांगलाच वेग आला आहे. राष्ट्रवादी काँग्रेस पक्षाने उमेदवारांची नावे जाहीर केली आहे. राष्ट्रवादीकडून दोन उमेदवारांची नावे जाहीर करण्यात आली असून त्यात ज्येष्ठ नेते एकनाथ खडसे आणि रामराजे नाईक निंबाळकर यांचा समावेश आहे.
राष्ट्रवादीकडून एकनाथ खडसे यांना उमेदवारी देण्यात येणार असल्याची जोरदार चर्चा गेल्या काही दिवसांपासून सुरू होती. राष्ट्रवादी काँग्रेस पक्षातर्फे येत्या विधानपरिषद निवडणुकीसाठी रामराजे नाईक निंबाळकर आणि एकनाथ खडसे हे उमेदवार असतील. दोन्ही उमेदवार विजयी होऊन महाराष्ट्रातील जनतेच्या सेवेसाठी कार्यरत राहतील, असा आम्हाला विश्वास आहे, असे ट्वीट राष्ट्रवादीचे नेते जयंत पाटील यांनी केले आहे. रामराजे नाईक निंबाळकर आणि एकनाथ खडसे आज आपला उमेदवारी अर्ज भरणार आहेत.
राज्यात विधानपरिषदेच्या 10 जागांसाठी येत्या 20 जूनला निवडणूक होणार आहे. अर्ज मागे घेण्याची तारीख 13 जून 2022 आहे. या निवडणुकींच्या पार्श्वभूमीवर भाजप, शिवसेना, काँग्रेसनंतर आता राष्ट्रवादीनेही आपल्या उमेदवारांनी नावे जाहीर केली आहेत.
