बारावीच्या परीक्षेची तयारी करणाऱ्या लाखो विद्यार्थ्यांसाठी दिलासादायक बातमी समोर (ticket) आली आहे. महाराष्ट्र राज्य माध्यमिक व उच्च माध्यमिक शिक्षण मंडळाकडून घेण्यात येणाऱ्या बारावीच्या परीक्षा २०२६ साठी हॉलतिकीट वितरणाबाबत महत्त्वाची घोषणा करण्यात आली आहे. येत्या काही दिवसांत परीक्षा सुरू होणार असल्याने विद्यार्थ्यांचे लक्ष हॉलतिकीट कधी मिळणार याकडे लागले होते.अखेर विद्यार्थ्यांची प्रतीक्षा संपली असून सोमवार, १२ जानेवारी २०२६ पासून बारावीच्या विद्यार्थ्यांना हॉलतिकीट उपलब्ध होणार आहेत. ही घोषणा राज्यभरातील सर्व उच्च माध्यमिक शाळा आणि कनिष्ठ महाविद्यालयांमधील विद्यार्थ्यांसाठी लागू असणार आहे. याबाबत संबंधित शाळा व महाविद्यालयांनाही आवश्यक सूचना देण्यात आल्या आहेत.
महाराष्ट्र राज्य माध्यमिक व उच्च माध्यमिक शिक्षण मंडळाचे सचिव (ticket) डॉ. दीपक माळी यांनी दिलेल्या माहितीनुसार, १२ जानेवारीपासून महाविद्यालयांच्या अधिकृत लॉगिनवर विद्यार्थ्यांची हॉलतिकीट उपलब्ध करून देण्यात येणार आहेत. त्यानंतर संबंधित महाविद्यालये ही हॉलतिकीट विद्यार्थ्यांना वितरित करतील.हॉलतिकीट मंडळाच्या अधिकृत संकेतस्थळावरून ऑनलाइन पद्धतीने डाउनलोड करण्यात येणार असून, त्याची छायांकित प्रत काढून विद्यार्थ्यांना देणे महाविद्यालयांना बंधनकारक आहे. या हॉलतिकीटवर मुख्याध्यापक किंवा प्राचार्यांची स्वाक्षरी व शिक्का असणे आवश्यक असणार आहे.
हॉलतिकीट मिळवण्यासाठी विद्यार्थ्यांकडून कोणतेही वेगळे किंवा (ticket) अतिरिक्त शुल्क आकारले जाणार नाही, असे मंडळाकडून स्पष्ट करण्यात आले आहे. यासाठी विद्यार्थ्यांना कोणत्याही प्रकारची ऑनलाइन फी भरण्याची गरज नसून संपूर्ण प्रक्रिया सुलभ ठेवण्यात आली आहे. त्यामुळे विद्यार्थ्यांवर कोणताही आर्थिक बोजा पडणार नाही.दरम्यान, हॉलतिकीटमध्ये नाव, विषय, माध्यम, फोटो किंवा स्वाक्षरी संदर्भात काही त्रुटी आढळल्यास संबंधित शाळा किंवा कनिष्ठ महाविद्यालयांनी विभागीय मंडळाशी संपर्क साधून दुरुस्ती करून घ्यावी. हॉलतिकीट गहाळ झाल्यास ‘द्वितीय प्रत’ देण्याची तरतूदही करण्यात आली आहे. एकंदरीत, १२ जानेवारीपासून हॉलतिकीट सहज आणि विनामूल्य उपलब्ध होणार असल्याने बारावीच्या विद्यार्थ्यांना मोठा दिलासा मिळाला आहे.
