पेट्रोल-डिझेलच्या दरवाढीचे सत्र सुरुच आहे. आज पुन्हा पेट्रोल-डिझेलच्या दरामध्ये वाढ झाली आहे. मागच्या दहा दिवसातील ही नववी दरवाढ आहे. पेट्रोलियम कंपन्यांनी गुरुवारी सकाळी 6 वाजता पेट्रोल-डिझेलचे नवीन दर लागू केले आहेत. त्यानुसार पेट्रोलमध्ये 80 पैशांची तर डिझेलमध्ये सुद्धा 80 पैशांनी वाढ करण्यात आली आहे. आज सकाळी 6 वाजल्यापासून हे नवीन दर लागू करण्यात आले आहेत.
नवीन दरवाढीनुसार, मुंबईमध्ये मात्र पेट्रोलच्या दरात प्रति लिटर 85 पैशांची तर डिझेलच्या दरामध्ये सुद्धा प्रति लिटर 85 पैशांची दरवाढ झाली आहे. या दरवाढीनुसार आज मुंबईमध्ये एक लिटर पेट्रोलची किंमत (Mumbai Petrol Price) 116.72 रुपये आणि एक लिटर डिझेलची किंमत (Mumbai Diesel Price) 100.94 रुपये झाली आहे. तर दिल्लीत एक लिटर पेट्रोलचा दर (Delhi Petrol Price) 101.81 रुपये आणि डिझेलचा दर (Delhi Diesel Price) 93.07 रुपये प्रति लिटरवर पोहोचले आहे. गेल्या 10 दिवसांत देशाच्या राजधानीचं शहर असलेल्या दिल्लीमध्ये पेट्रोल-डिझेच्या दर 6.40 रुपयांनी महागलं आहे.
देशामध्ये 22 मार्चपासून पेट्रोल-डिझेलच्या दरामध्ये वाढ होण्यास सुरुवात झाली आहे. त्यानंतर फक्त एक दिवस वगळता इतर सर्व दिवस दरवाढीचे सत्र सुरुच आहे. 31 मार्चपर्यंत म्हणजे या दहा दिवसांच्या काळामध्ये पेट्रोल-डिझेल 6.40 रुपये प्रति लिटरने महागले आहे. तज्ज्ञांनी दिलेल्या माहितीनुसार, आंतरराष्ट्रीय बाजारात कच्च्या तेलाच्या दरामध्ये (Crude Oil Price) खूपच वाढ झाली आहे. त्यात रशिया आणि युक्रेन युद्धामुळे कच्च्या तेलाच्या आयात-निर्यातीवर परिणाम झाला आहे. ज्याचा परिणाम पेट्रोल-डिझेलच्या किमतींवर झाल्याचे पाहायला मिळत आहे. यासर्व कारणांमुळेच भारतामधअये पेट्रोल-डिझेलच्या दरामध्ये वाढ झाली आहे.
