ताजी बातमी ऑनलाईन टीम
सोनी (ता. मिरज) येथील प्रमोद बाळासाहेब चौगुले यांनी दुसर्‍या प्रयत्नात महाराष्ट्र लोकसेवा आयोगामार्फत घेण्यात आलेल्या राज्यसेवेच्या परीक्षेत राज्यात प्रथम क्रमांक मिळवला. त्यांच्या सोनी येथील मूळ गावी व सांगलीतील घरी मोठा जल्लोष साजरा करण्यात आला. मोठ्या कष्टातून सेवेत पहिल्या क्रमांकावर बाजी मारल्याने आई-वडिलांना अश्रू अनावर झाले होते.
प्रमोद चौगुले त्यांचे प्राथमिक शिक्षण सोनी झाले होते. त्यांचे बारावीपर्यंतचे शिक्षण पलूस (जि. सांगली) येथील नवोदय विद्यालय झाले होते. त्यांनी कराड येथून मेकॅनिकल इंजिनिअरिंग पदवी घेतली. उच्चशिक्षित प्रमोद चौगुले यांची भारत पेट्रोलियममध्ये निवड झाली होती. चौगुले यांनी जामनगर येथे सेवा बजावली आहे. भारत पेट्रोलियममध्ये काम करत असताना येणार्‍या वेगळ्या अधिकार्‍यांच्या संपर्कातून त्यांना स्पर्धा परीक्षेची प्रेरणा मिळाली. त्यांनी यूपीएससीची तयारी केली. परंतु त्यांना त्यामध्ये यश आले नाही. परंतु महाराष्ट्र लोकसेवा आयोगामार्फत घेण्यात येणार्‍या राज्यसेवेच्या परीक्षेत मात्र त्यांनी केवळ दुसर्‍या प्रयत्नात घवघवीत यश मिळवत पहिल्या क्रमांकावर बाजी मारली. पहिल्या प्रयत्नात यांची एका मार्कात संधी हुकली होती. त्याची कसर भरून काढत त्यांनी पहिला क्रमांक मिळवला आहे.
प्रमोद चौगुले यांचे वडील बाळासो चौगुले हे ड्रायव्हर होते. तर आई घरी शिवन काम करते. अत्यंत हलाखीच्या परिस्थितीत प्रमोद चौगुले यांनी यश मिळवले आहे.
