विधानसभा निवडणूक 2024 पूर्वी महायुती सरकारने सुरू केलेली मुख्यमंत्री माझी लाडकी बहीण योजना खूपच लोकप्रिय झाली. ही योजना निवडणुकीत गेमचेंजर ठरल्याचं बोललं जात आहे.
या योजनेमुळेच महायुतीचा निवडणुकीत महाविजय झाला. योजनेच्या अंतर्गत लाडक्या बहिणींना दरमहा 1500 रुपये देण्यात येतात. आतापर्यंत 10 हप्ते लाडक्या बहिणींना देण्यात आले आहेत. पण योजनेसाठी दरमहा कोट्यवधींचा निधी देताना सरकारच्या अडचणी वाढत आहेत. त्यातच आता एक मोठी अपडेट समोर आली आहे. मुख्यमंत्री माझी लाडकी बहीण योजनेसाठी आदिवासी विभागाचा निधी वळवण्यात आल्याचं वृत्त समोर आलं आहे.माध्यमांमध्ये आलेल्या वृत्तानुसार, राज्य सरकारने आदिवासी विकास खात्याचा निधी लाडकी बहीण योजनेसाठी वळवला आहे. एप्रिल महिन्याप्रमाणेच मे महिन्याच्या हप्त्यासाठी 335 कोटी 70 लाख रुपयांचा निधी महिला आणि बालविकास खात्याकडे वळवण्यात आला आहे.विधानसभा निवडणुकीपूर्वी महायुती सरकारने लाडकी बहीण योजनेचे पाच हप्ते दिले. तर विधानसभा निवडणुकीनंतर आतापर्यंत पाच हप्ते दिले आहेत. पण महायुती सरकारच्या तिजोरीत पैसे नसल्याने लाडक्या बहिणींना दरमहा 1500 रुपये देताना सरकारची दमछाक होत आहे. त्यामुळेच इतर विभागांचा निधी लाडकी बहीण योजनेसाठी वळवण्यात येऊ लागला आहे.
प्रत्येक महिन्याला लाडक्या बहिणींसाठी निधी
राज्य सरकारने 2025-26 या वर्षाच्या अर्थसंकल्पात अनुसूचित जमाती उपयोजनेसाठी 21 हजार 495 कोटींच्या निधीची तरदूत केली होती. त्यैपैकी आदिवासी विकास खात्याला देण्यात आलेल्या 3420 कोटी रुपयांच्या अनुदानातून दोन वेळा 335 कोटी 70 लाखांचा निधी दोनवेळा लाडकी बहीण योजनेसाठी वळवण्यात आला. म्हणजेच एकूण 671 कोटी 40 लाखांचा निधी आतापर्यंत वळवण्यात आल्याचं वृत्त समोर आलं आहे.
मे महिन्याचा हप्ता नेमका कधी मिळणार?
लाडक्या बहिणींना दरमहा देण्यात येणाऱ्या 1500 रुपयांसाठी प्रत्येक महिन्यात उशीर होत आहे. एप्रिल महिन्याचा हप्ता तर मे महिन्याच्या सुरुवातीला देण्यात आला. आता आदिवासी विकास विभागाचा निधी लाडकी बहीण योजनेसाठी वळवण्यात आल्याने मे महिन्याचा हप्ता कधी मिळणार असा प्रश्न अनेकांच्या मनात उपस्थित होत आहे. मिळालेल्या प्राथमिक माहितीनुसार, पुढील आठवड्यात म्हणजेच 31 मे पर्यंत लाडक्या बहिणींच्या खात्यावर मे महिन्याचे 1500 रुपये जमा करण्यात येणार आहेत.
