शेतकऱ्यांनो, तुमच्या शेतीच्या कामांसाठी आता सरकारने दिलेला मोठा दिलासा – किसान क्रेडिट कार्ड (KCC) योजना. ही देशातील सर्वात स्वस्त आणि सुलभ कृषी कर्ज योजना मानली जाते. बियाणे, खते, मजुरी, पिकांची कापणी, पशुपालन, घरगुती गरजा, शेती यंत्रसामग्रीची देखभाल अशा अनेक कामांसाठी तुम्ही याच्या मदतीने कर्ज घेऊ शकता.
कमी व्याजाचा फायदा कसा मिळतो?
सरकार या योजनेअंतर्गत 2% व्याज अनुदान आणि वेळेवर कर्ज फेडल्यास 3% बोनस देते. त्यामुळे पात्र शेतकऱ्यांना केवळ 4% वार्षिक व्याजदराने कर्ज मिळतं. हे देशातील सर्वात कमी व्याजदरातील कृषी कर्जांपैकी एक आहे.
योजनेचा इतिहास
1998 मध्ये सुरू झालेली ही योजना, शेतकऱ्यांना स्वस्त दरात व वेळेत कर्ज उपलब्ध करून देण्यासाठी राबवली जाते. किसान क्रेडिट कार्ड हे डेबिट कार्डसारखं काम करतं. तुम्ही याच्या मदतीने एटीएम, बँक मित्र किंवा विक्रेत्यांच्या पीओएस मशीनवरून थेट पैसे काढू शकता किंवा खरेदी करू शकता.
सरकारी आकडेवारीनुसार, आज देशभरात 7.75 कोटींहून अधिक सक्रिय KCC खाती आहेत. 2014 मध्ये या योजनेतून 4.26 लाख कोटींचं कर्ज दिलं गेलं होतं, जे 2024 च्या अखेरीस 10.05 लाख कोटींवर पोहोचलं आहे.
कर्ज मर्यादा व अटी
कर्ज मर्यादा पिकाचा प्रकार, जमिनीचं क्षेत्रफळ, लागवडीचा खर्च, विमा प्रीमियम आणि यंत्रसामग्रीच्या देखभालीवर अवलंबून ठरते.
सुरुवातीला ठरवलेल्या मर्यादेत दरवर्षी 10% नैसर्गिक वाढ धरून पुढील पाच वर्षांची कर्ज मर्यादा ठरते.
2025 च्या अर्थसंकल्पात कमाल कर्ज मर्यादा 3 लाखांवरून 5 लाखांपर्यंत वाढवली आहे.
2 लाखांपर्यंतचं कर्ज तारणमुक्त आहे. त्यापेक्षा जास्त रकमेच्या कर्जासाठी तारण आवश्यक असू शकतं.
कर्जाचे प्रकार
अल्पकालीन कर्ज – हंगामी पिकांच्या खर्चासाठी
मुदत कर्ज – ट्रॅक्टर, सिंचन साधनांसारख्या दीर्घकालीन गुंतवणुकीसाठी
अर्ज कसा कराल?
ऑनलाइन अर्ज
तुमच्या बँकेच्या अधिकृत वेबसाइटवर जा
किसान क्रेडिट कार्ड पर्याय निवडा आणि ‘Apply’ वर क्लिक करा
आवश्यक माहिती भरून सबमिट करा
अर्ज क्रमांक मिळाल्यानंतर बँक 3-4 दिवसांत संपर्क साधेल
ऑफलाइन अर्ज
जवळच्या बँक शाखेत जाऊन अर्ज फॉर्म भरा
आवश्यक कागदपत्रे सादर करा
पात्रतेनुसार कार्ड मंजूर केलं जातं
आवश्यक कागदपत्रे
भरलेला अर्ज
ओळखपत्र व पत्त्याचा पुरावा (आधार, ड्रायव्हिंग लायसन्स इ.)
पासपोर्ट आकाराचा फोटो
जमिनीच्या मालकीचा पुरावा
पीक पद्धतीची माहिती
1.60 लाखांपेक्षा जास्त कर्जासाठी तारण किंवा हमीपत्र
शेतकऱ्यांसाठी फायदेशीर ठरणारी योजना
KCC योजना लहान व सीमांत शेतकऱ्यांसाठी आर्थिक सुरक्षेचं मोठं साधन ठरली आहे. कमी व्याजदर, सोप्या अटी आणि डिजिटल प्रक्रियेमुळे आता कर्ज घेणं जलद आणि पारदर्शक झालं आहे. वेळेवर परतफेड केली, तर या कर्जाचा फायदा आणखी वाढतो.
