आयएनएस विक्रांत घोटाळाप्रकरणी अटकेची टांगती तलवार असलेले भाजप नेते किरीट सोमय्या यांच्यावर शिवसेना खासदार संजय राऊत यांनी हल्लाबोल केलाय. ते महान नेते आहेत, अनेकांच्या भ्रष्टाचारावर त्यांनी हल्ले केले आहेत. लोकांना कायद्यापासून पळू नका अशी प्रेरणा त्यांनी दिली आणि आता तेच **** पाय लावून पळत असल्याची घणाघाती टीका संजय राऊत यांनी सोमय्यांवर मुंबईत माध्यमांशी बोलताना केली.
संजय राऊत म्हणाले, पोलीस आयएनएस घोटाळ्याचा तपास करत आहेत. ते प्रकरण न्यायप्रविष्ट आहे. हे प्रकरण भाजप सरकार करते त्याप्रमाणे राजकीय सुडापोटी केलेले नाही. त्या प्रकरणाचा माझा काहीही संबंध नाही. भोसले नावाचे निवृत्त लष्करी अधिकारी तक्रारदार आहेत. त्यांनी तक्रार दाखल केली आहे. कोणी किती पैसे गोळा केले, पैसे गोळा करून काय विनियोग केला हा पोलीस तपासाचा भाग आहे.
भाजपचे लोक आमच्यासारख्यांवर गेल्या काही वर्षापासून आरोप करतात अशाप्रकारचा हा आरोप नाही. हवेत काहीही बोलायचे आणि भ्रम तयार करायचे असे हे नाही. त्यांनी पैसे गोळा केले आहेत आणि ५८ कोटीचा आकडा समोर आला आहे. ११ हजार की ५८ कोटी पैसे जमा झाले हा पोलीस तपासाचा भाग आहे. आम्ही राजकीय सुडापोटी कारवाई करत नसल्याचे संजय राऊत यांनी सांगितले.
काही भीती तुमच्या मनात नसेल तर पोलिसांसमोर हजर व्हायला पाहिजे. ते अटकपूर्व जामीनासाठी अर्ज करत आहेत. ते पळत आहेत, भूमिगत होत आहेत. ते महान नेते आहेत, त्यांनी अनेकांच्या भ्रष्टाचारावर हल्ले केले आहेत. कायद्यापासून पळू नका यासाठी त्यांनी लोकांना प्रेरणा दिलीय आणि तेच **** पाय लावून पळत आहेत. असे पळू नका, असे माझे आवाहन आहे, असे म्हणत राऊतांनी सोमय्यांना टोला लगावला.
संजय राऊत म्हणाले, अजून अनेक प्रकरणे समोर येतील. लोकांना ब्लॅकमेल करून, ईडीच्या, तपास यंत्रणेच्या धमक्या देऊन कोणी कोठे पैसे घेतले आणि थायलंडला कोणी पैसे जमा करायला लावले हे देखील लवकरच समोर येईल. आधी येथे आरोप करायचे, दबाव आणायचा, ईडीच्या, सीबीआयच्या, तुरुंगात धमक्या द्यायच्या आणि मग सौदा करण्यासाठी थायलंड बँकॉकमध्ये व्यवस्था करायची, तिथे पैसे स्विकारायचे अशी अनेकांची अनेक प्रकरणे आता समोर येतील.
