सोलापूरच्या भाजपचे जिल्हाध्यक्ष श्रीकांत देशमुख यांचा एका महिलेसोबतचा आक्षेपाहार्य व्हिडीओ व्हायरल झाला आहे. त्यामुळे सोलापूरच्या (solapur) राजकारणात एकच खळबळ उडाली आहे. या व्हिडीओत महिलेने ८ देशमुख यांच्यावर गंभीर आरोप केले आहेत. देशमुख यांनी आपल्याशी संबंध ठेवून आता आपल्याला धोका दिल्याचं म्हटलं आहे. ही महिला रडत रडतच हे सांगत आहे. या व्हिडीओत देशमुखही दिसत असून त्यांच्याकडे बोट करून ही महिला हे सांगत आहे. त्यामुळे एकच खळबळ उडाली आहे. आज सकाळपासून हा व्हिडिओ सर्वत्र व्हायरल झाला आहे.
हा व्हिडीओ व्हायरल झाल्याने भाजपमध्येही खळबळ उडाली आहे. भाजप नेतृत्वाने या प्रकरणाची गंभीर दखल घेऊन देशमुख यांच्याकडे विचारणा केल्याचं सूत्रांनी सांगितलं. दरम्यान, देशमुख यांनीही आपल्या जिल्हाध्यक्षपदाचा राजीनामा दिला असून भाजपचे प्रदेशाध्यक्ष चंद्रकांत पाटील यांनी हा राजीनामा स्वीकारला आहे. मात्र, राजीनामा का देत आहे, त्याचं कारण या राजीनामा पत्रात नाही. या व्हिडिओत ही महिला आणि श्रीकांत देशमुख दोघेच दिसत आहेत. हॉटेल किंवा घरातील हा व्हिडिओ असावा. देशमुख हे बनियानवर बेडवर बसलेले आहेत. तर ही महिला व्हिडीओ शुटींग करताना रडताना दिसत आहे. 28 सेकंदाचा हा व्हिडीओ आहे. पण व्हिडीओत दोन वेळा हे संभाषण दाखवण्यात आलं आहे. ही महिला रडत रडत तिच्यावरील अन्यायाची माहिती देत असताना देशमुख जागेवरून उठताना आणि या महिलेकडून कॅमेरा हिसकावून घेताना दिसत आहेत. त्यामुळे कॅमेरा हलला आहे. या दोघांमध्ये शाब्दिक चकमक उडालेली दिसत आहे.
