विश्वचषक २०२३च्या ३७व्या सामन्यात आज भारताचा सामना दक्षिण आफ्रिकेशी होत आहे. हा सामना या विश्वचषकातील सर्वात मनोरंजक सामना ठरू शकतो, असे बोलले जात आहे. दोन्ही संघ जबरदस्त फॉर्मात आहेत. भारताने आतापर्यंतचे सातही सामने जिंकले आहेत. त्याचबरोबर दक्षिण आफ्रिकेने सातपैकी सहा सामने जिंकले आहेत. आज जिंकणारा संघ गुणतालिकेत अव्वल स्थानावर राहील. हा सामना कोलकात्याच्या ईडन गार्डन्सवर खेळवला जाईल.
भारतीय संघात श्रेयस अय्यर आणि सूर्यकुमार यादव हे एकमेव फलंदाज आहेत ज्यांना संघातून वगळले जाऊ शकते. ते बाहेर गेल्यास रविचंद्रन अश्विन किंवा शार्दुल ठाकूरला संधी मिळू शकते. दोघेही गोलंदाजीबरोबर थोडीफार फलंदाजीही करू शकतात. त्याचबरोबर मधल्या फळीत इशान किशनलाही संधी दिली जाऊ शकते. कारण, भारत उपांत्य फेरीत पोहोचला आहे आणि संघ व्यवस्थापन इशानलाही संधी देऊ इच्छित आहे. जेणेकरून गरज पडल्यास उपांत्य आणि अंतिम सामन्यांपूर्वी त्याला सामन्याचा सराव असू शकतो
IND vs SA: कोलकात्याच्या ईडन गार्डन्सची काय आहे आकडेवारी? जाणून घ्या
फलंदाजीसाठी योग्य मानल्या जाणाऱ्या कोलकात्याच्या या खेळपट्टीवर नाणेफेक जिंकून प्रथम फलंदाजी करण्याचा निर्णय फायदेशीर ठरू शकतो. या मैदानाची आकडेवारीही प्रथम फलंदाजी करणाऱ्यासाठी चांगली मानली जाते. ईडन गार्डन्स मैदानावर आतापर्यंत एकूण ३७ एकदिवसीय सामने खेळले गेले आहेत. या कालावधीत प्रथम फलंदाजी करणाऱ्या संघाने २१ सामन्यांत विजय मिळवला आहे. केवळ १५ वेळा लक्ष्याचा पाठलाग करणाऱ्या संघाला यश मिळाले आहे
IND vs SA: काय रंग दाखवणार आजची खेळपट्टी?
या स्पर्धेत आतापर्यंत या मैदानावर दोन सामने झाले असून दोन्ही सामन्यांमध्ये गोलंदाजांनी वर्चस्व गाजवले आहे. वेगवान गोलंदाज आणि फिरकीपटू दोघांनाही जवळपास समान मदत मिळाली आहे. आजच्या सामन्यातही खेळपट्टीचे स्वरूप असेच असेल अशी अपेक्षा आहे.
ईडन गार्डन्सची खेळपट्टी फलंदाजांसाठी उपयुक्त मानली जाते. खेळपट्टीवर चांगली उसळी मिळाल्याने फलंदाजांना फटके खेळणे सोपे जाते. मात्र, वेगवान गोलंदाजही सुरुवातीला नव्या चेंडूने आपली ताकद दाखवतात. तर दुसऱ्या डावात फिरकी गोलंदाजांची भूमिका महत्त्वाची ठरते.
