इन्कम टॅक्स रिटर्न भरण्यात अनेकांना अडचणी येत आहेत. त्यामुळे आयटीआर फाईल करण्याची शेवटची तारीख वाढवण्याची मागणी करण्यात येत आहे. इन्कम टॅक्स रिटर्न फाईल करण्याची शेवटची तारीख 31 जुलै आहे.
मात्र, तांत्रिक अडचणींमुळे अनेकांना आयटीआर फाईल करण्यात समस्या येत आहेत. म्हणून आयटीआर फाईल करण्याची शेवटची तारीख वाढवण्याची मागणी होत आहे.
इन्स्टिट्यूट ऑफ चार्टड अकाऊंट्स ऑफ इंडिया (ICAI) ने इन्कम टॅक्स विभागाला एक पत्र लिहिले आहे की, इन्कम टॅक्स ई-फायलिंग पोर्टलवर आयटीआर फाईल करण्यासाठी करदात्यांना अडचणींचा सामना करावा लागत आहे. त्यामुळे शेवटची तारीख वाढवण्यात यावी. आयटीआर फाईल करण्यासाठी अनेक अडचणींचा सामना करावा लागत असल्याच्या तक्रारी करदात्यांकडून सोशल मीडियात करण्यात येत आहेत
आयटीआर फाईल करण्यात काय येतायत अडचणी?
इन्कम टॅक्स रिटर्न फाईल करण्यात येणाऱ्या ई-फायलिंग पोर्टलवर तांत्रिक अडचणींचा सामना करावा लागत आहे. यामध्ये इन्कम टॅक्स पोर्टलवर लॉग ईन करण्यात अडचणी येत आहेत. फॉर्म अॅक्सेस करण्यात किंवा डाऊनलोड करण्यात सुद्धा अडचणी येत आहेत. तसेच काहींना आधी भरलेल्या डेटामध्ये चुका दिसत आहेत, इन्कम टॅक्स पोर्टलमध्ये AIS आणि TIS मध्ये रिप्लाय सबमिट करण्यासाठी मर्यादित पर्याय, पासवर्ड रिसेट करण्यात अडचणी, टॅक्स पेमेंट करताना चालान बनवण्यात अडचणी येत आहेत. तर काहींना आयटीआर भरताना रिटर्न ई-व्हेरिफाय करण्यात सुद्धा अडचणी येताना दिसून येत आहेत. त्यामुळेच करदात्यांकडून आयटीआर फाईल करण्याची शेवटची तारीख वाढवण्यात यावी अशी मागणी होत आहे.
इन्कम टॅक्स विभागाने केलं मान्य
याच दरम्यान, इन्कम टॅक्स विभागाने काही तांत्रिक समस्या असल्याचं मान्य केलं आहे. तसेच या समस्या सोडवण्याचे काम सुरू आहे मात्र, या समस्या सोडवण्यास किती वेळ लागेल हे सांगितलेले नाहीये. ICAI ने करदात्यांना कर भरण्यात आणि ई-फायलिंग पोर्टलवर रिटर्न दाखल करण्यात तांत्रिक अडचणींमुळे उद्भवणाऱ्या समस्यांवर फोकस केलं आहे. चार्टर्ड अकाऊंट्स यांच्या संघटनेने आयटीआर फाईल करण्याची शेवटची तारीख 31 जुलै आहे ती वाढवण्याची मागणी केली आहे. जेणेकरुन करदात्यांना आयटीआर फाईल करता येईल. मात्र, या संदर्भात अद्याप सरकारकडून कोणतीही प्रतिक्रिया आलेली नाहीये.
