कोल्हापूर जिल्ह्यात पावसाचा(rain)जोर कायम असून, नदी आणि धरणांमध्ये पाण्याची पातळी वाढत चालली आहे. गेल्या काही दिवसांपासून मुसळधार पावसामुळे जिल्ह्यातील ४६ बंधारे पाण्याखाली गेले आहेत. जिल्ह्यातील अनेक भागांमध्ये मुसळधार पावसाचे प्रमाण कायम असल्याने नदीकिनारी राहणाऱ्या नागरिकांना सतर्कतेचा इशारा देण्यात आला आहे.
जिल्ह्यातील गगनबावडा, पन्हाळा, शाहूवाडी, करवीर, गडहिंग्लज, भुदरगड, आजरा आणि चंदगड तालुक्यांमध्ये जोरदार पाऊस सुरू असून, राधानगरी आणि वारणा धरणांमध्ये पाण्याची पातळी वाढल्यामुळे विसर्ग सुरू करण्यात आला आहे. राधानगरी धरणाचे तीन दरवाजे उघडण्यात आले असून, वारणा धरणातून ३८६५ क्युसेक विसर्ग सुरू आहे.
अणुस्कुरा घाटात दरड कोसळल्यामुळे कोल्हापूर-कोकण मार्गावरील वाहतूक प्रभावित झाली होती. प्रशासनाच्या तात्काळ उपाययोजनांमुळे आता या मार्गावरून एकेरी वाहतूक सुरू झाली असून, प्रवासी आणि वाहनचालकांना दिलासा मिळाला आहे.
जिल्ह्यातील पावसाची परिस्थिती आणि पुढील संभाव्य धोके लक्षात घेता नागरिकांनी योग्य ती खबरदारी घेण्याचे आवाहन प्रशासनाने केले आहे.
