काल शुक्रवारी भारतीय शेअर बाजारात झालेल्या गोंधळानंतर गुंतवणूकदारांमध्ये भीतीचे वातावरण आहे. जर आपण एकूण BSE मार्केट कॅपिटलायझेशनवर नजर टाकली तर गेल्या पाच महिन्यांत त्यात 92 लाख कोटी रुपयांची घट झाली आहे.
त्याच वेळी, सतत पाच महिन्यांच्या घसरणीमुळे जवळपास 30 वर्षांचा विक्रम मोडला आहे. काल सेन्सेक्स 1400 हून अधिक अंकांनी घसरला, तर निफ्टी 420 अंकांनी घसरला.
या प्रचंड घसरणीनंतर, गुंतवणूकदारांना आशा होती की ट्रम्प-झेलेन्स्की बैठक सकारात्मक होईल आणि रशिया-युक्रेन युद्ध संपण्याचा मार्ग मोकळा होईल. परंतु ट्रम्प-झेलेन्स्की यांच्यातील वादामुळे चिंता निर्माण झाली आहे. कारण अमेरिकन सरकारचा रशियाबाबतचा दृष्टिकोन युरोपीय देशांच्या भू-राजकीय शांततेला आणि भारतीय व्यापाराला नुकसान पोहोचवू शकतो.
शेअर बाजार तज्ज्ञांचे मत काय?
शेअर बाजार तज्ज्ञांच्या मते, ट्रम्प-झेलेन्स्की बैठक नवीन तणाव निर्माण करू शकते, कारण रशिया-युक्रेन युद्धामुळे भारताला रशियाकडून स्वस्त दरात कच्चे तेल विकत घेऊन युरोपियन देशांमध्ये निर्यात करण्याची संधी मिळाली होती. आता डोनाल्ड ट्रम्प यांनी रशियन सरकारला पाठिंबा देऊन रशिया-युक्रेन युद्धापासून स्वतःला दूर केले आहे.
भारतावर काय परिणाम होऊ शकतो?
इराक, अफगाणिस्तान आणि तैवान या देशांप्रमाणेच अमेरिकेने युक्रेनला मोकळे सोडले आहे. अशा परिस्थितीत भू-राजकीय तणाव वाढू शकतो. त्यामुळे भारतीय शेअर बाजाराची भावना नकारात्मकतेकडे जाऊ शकते.
रशियावर लादलेले निर्बंध पाहता भारत युरोपीय देशांना तेल निर्यात करणारा देश बनला. भारताने रशियाकडून सवलतीच्या दरात तेल खरेदी केले आणि युरोपीय देशांमध्ये निर्यात केले. आता या ट्रम्प-झेलेन्स्की भेटीनंतर युरोपीय देशही रशिया-युक्रेन युद्धातून माघार घेऊ शकतात आणि रशियावरील निर्बंध हटवू शकतात. भारताच्या व्यवसायावर याचा परिणाम होऊ शकतो.
झेलेन्स्की आणि ट्रम्प यांच्या बैठकीत झालेला निर्णय अमेरिकेसाठी चांगला आहे. अशा परिस्थितीत डॉलर आणखी वाढू शकतो, त्यामुळे भारतीय रुपया आणखी दबावाखाली येऊ शकतो. भारतीय बाजारासाठी हे चांगले लक्षण नाही.
झेलेन्स्की आणि ट्रम्प यांच्यातील बैठकीच्या निकालानंतर भू-राजकीय तणाव वाढू शकतो, ज्यामुळे जगभरात चलनवाढीचा धोका आणखी वाढेल. याचा परिणाम भारतासह जागतिक बाजारपेठेवर होणार आहे.
झेलेन्स्की आणि ट्रम्प यांच्यातील बैठकीच्या निकालानंतर सोमवारी बाजार उघडेल तेव्हा भारतीय बाजारात परदेशी गुंतवणूकदारांची विक्री वाढू शकते, ज्यामुळे बाजार आणखी घसरु शकतो.
गुंतवणूकदारांनी काय करावे?
शेअर बाजार आणखी किती घसरणार याची वाट पाहिली पाहिजे, असे तज्ज्ञांचे म्हणणे आहे. तुम्ही सध्या कोणत्याही प्रकारची खरेदी टाळली पाहिजे. एसआयपी करणाऱ्यांनी त्यांची गुंतवणूक थांबवू नये. तुम्हाला कोणताही शेअर विकत घ्यायचा असला तर चांगल्या शेअर्सवर लक्ष ठेवा आणि तेही तज्ञांच्या सल्ल्याशिवाय खरेदी करू नका.
