पुणे येथे सकाळी मॉर्निंग वॉकला गेलेल्या महिलेचे मंगळसुत्र एका स्विगी डिलीवरी बॉयच्या वेशात मोटारसायकलवरुन आलेल्या तरुणाने हिसावल्याची खळबळजनक घटना १६ मे रोजी उघडकीस आली होती. या प्रकरणात संशय येऊ नये म्हणून या तरुणाने स्विगी कंपनीच्या डिलिव्हरी बॉयचा पेहराव घातला होता.या तरुणाला अखेर सीसीटीव्हीच्या मदतीने पोलिसांना दुपारी शोधून काढत त्यास अटक केली आहे.
पुण्यातील सहकार नगरात राहणाऱ्या एक महिला सकाळी सहा वाजण्याच्या सुमारास मॉर्निंगवॉकला जात होत्या. त्यावेळी हिलटॉप सोसायटी, सिध्दीविनायक मंदिरा जवळ धनकवडी येथे दुचाकीवरील तरुणाने त्याच्या गळ्यातील मंगळसूत्र खेचून पलायन केले होते. पोलिसांनी दिलेल्या माहितीनुसार, १६ मे रोजी सकाळी ६ वाजता फिर्यादी हिलटॉप सोसायटी,सिध्दीविनायक मंदिराजवळ धनकवडी येथे मॉर्निंग वॉकसाठी गेल्या होत्या.यावेळी एका दुचाकीवरुन आलेल्या अनोळखी तरुणाने त्यांच्या गळ्यातील सोन्याचे मंगळसुत्र जबरदस्तीने हिसका मारून तोडून चोरून नेले.
पुणे सहकारनगर पोलीसांची कारवाई
ज्येष्ठ महिलेने या संदर्भात सहकारनगर पोलिस ठाण्यात फिर्याद दिली होती. अमोल किसन नाकते ( वय २७) असे अटक केलेल्या तरुणाचे नाव आहे. या घटनेचा तपास करीत असताना पोलिसांनी परिसरातील १५० सीसीटीव्ही फुटेज तपासले. त्यावरून गुन्हा केलेला आरोपी हा स्विगी कंपनीचा डिलिव्हरी बॉय म्हणून फिरत असल्याचे निष्पन्न झाले. या आरोपीचा शोध घेत असताना हा तरुण आंबेगाव पठार येथे कोणाची तरी वाट पाहत असल्याची माहिती पोलिसांना मिळाली. पोलिसांनी त्याठिकाणी साध्या वेषातील पोलीस पाठवून कारवाई केली. पोलिस येताच त्याने तिथून पळून जाण्याचा प्रयत्न केला आहे. पोलिसांनी त्याच्या मागे जात त्याला ताब्यात घेतले.
