महाराष्ट्र राज्य परिवहन महामंडळ नेहमीच आपल्या प्रवाशांसाठी वेगवेगळ्या योजना राबवत असते. सध्या MSRTC च्या बस मधून प्रवास करणाऱ्या महिलांना ५० टक्के सवलत आहे तर जेष्ठ नागरिकांचा प्रवास मोफत आहे. आता यात पत्रकारांचाही समावेश होणार आहे. MSRTC च्या बसेसमधून प्रवास करणाऱ्या पत्रकारांना दिल्या जाणाऱ्या सवलतीत लवकरच सुधारणा केली जाणार आहे. तसेच काही नवीन सवलती लागू करण्याचा प्रस्तावही शासन पातळीवर विचाराधीन असून, याबाबत लवकरच निर्णय होणार असल्याचे परिवहन मंत्री प्रताप सरनाईक यांनी सांगितले.
सध्या 8000 किमीची मर्यादा – Free ST Bus Travel
विधान भवनात मंत्रालय आणि विधिमंडळ वार्ताहर संघ पदाधिकाऱ्यांसोबत अधिस्वीकृती संदर्भातील बैठकीत बोलताना प्रत सरनाईक म्हणाले, सद्यस्थितीत अधिस्वीकृतीधारक पत्रकारांना साध्या, निमआराम व शिवशाही (आसनी/शयनयान) बसप्रकारामध्ये १००% प्रवास भाड्याची सवलत (Free ST Bus Travel) मिळते. मात्र, या सवलतीवर ८,००० किमीची मर्यादा आहे. ही मर्यादा रद्द करण्याची मागणी वारंवार होत असून, ती मंजूर करण्याबाबत सकारात्मक विचार सुरू आहे. तसेच पत्रकारांना एसटीच्या सर्व बसेस मधून मोफत प्रवास करण्याची सवलत अनुज्ञेय करावी अशी मागणी मुख्यमंत्र्यांकडे केली आहे. यामुळे पत्रकारांना जिल्हा व तालुका पातळीवर देखील सेवा देता येईल.
तसेच पत्रकारांना एसटी प्रवासासाठी (Free ST Bus Travel) सध्या ऑनलाइन रिजर्वेशन करण्याची सुविधा उपलब्ध नाही. येत्या १५ ऑगस्टपासून ऑनलाइन सीट आरक्षित करण्याची सुविधा उपलब्ध करून देण्याच्या दृष्टीने निर्णय घेण्यात आला आहे. त्यामुळे अधिस्वीकृतीधारक पत्रकारांना पुढील महिन्यापासून घरबसल्या एसटी बसमधून प्रवास करण्यासाठी सीट आरक्षित करता येईल. या निर्णयांमुळे पत्रकारांना काम करताना जास्तीच्या सुविधा उपलब्ध होणार आहेत असं सांगत मंत्रालय आणि विधिमंडळ वार्ताहर संघाच्या पदाधिकाऱ्यांनी मंत्री प्रताप सरनाईक यांचे आभार मानले.
