इयत्ता बारावीचे वर्ष हे खूपच महत्त्वाचे असते. या इयत्तेत चांगले गुण मिळाले तर भविष्यात पदवीसाठी चांगल्या महाविद्यालयात प्रवेश मिळू शकतो. सोबतच इयत्ता बारावीच्या परीक्षेनंतरच करिअरची खरी वाट खुली होते. त्यामुळेच हे वर्ष विद्यार्थ्यांच्या भावी आयुष्यासाठी खूप महत्त्वाचे मानले जाते. महाराष्ट्रात दरवर्षी लाखो विद्यार्थी या परीक्षेसाठी तयारी करत असतात. यंदादेखील अनेक विद्यार्थी या परीक्षेची तयारी करत आहेत. ही परीक्षा नेमकी कधी होणार, याची विद्यार्थी, पालक विचारणा करत होते. असे असतानाच आता राज्य शिक्षण मंडळाने इयत्ता बारावीच्या परीक्षेची तारीख जाहीर केली आहे. ही परीक्षा कधीपासून कधीपर्यंत होईल, याची माहिती समोर आली आहे.
इयत्ता बारावीची परीक्षा नेमकी कधीपासून सुरू होणार?
शिक्षण मंडळाने इयत्ता बारावीच्या परीक्षेची तारीख जाहीर केली आहे. विद्यार्थ्यांनी ही तारीख लक्षात घेऊनच अभ्यासाचे नियोजन करावे, असे आवाहन मंडळातर्फे करण्यात आले आहे. बारावीची लेखी परीक्षा 8 फेब्रुवारी रोजीपासून सुरू होईल. त्यानंतर ही परीक्षा 16 मार्चपर्यंत असेल. दरम्यान, कोणता पेपर नेमका कधी असेल याचे सविस्तर वेळापत्रक समोर आलेले नाही. परंतु परीक्षा मंडळाने पेपर सुरु होण्याची तारीख जाहीर केल्यामुळे विद्यार्थ्यांना आता आपल्या अभ्यासाचे नियोजन करता येणार आहे. विद्यार्थ्यांकडे सध्या एकूण पाच महिने आहेत. त्यामुळे परीक्षेची तारीख लक्षात घेऊन विद्यार्थ्यांना आपला अभ्यास करावा लागणार आहे.
विद्यार्थ्यांनी नेमकं काय करावं? अभ्यासाचं नियोजन कसं करावं?
दरम्यान, एकदा परीक्षेची तारीख जाहीर झाली की विद्यार्थ्यांना आपल्या अभ्यासाचे नियोजन करणे सोपे होते. परंतु परीक्षेची तारीख समोर आली की काही विद्यार्थ्यांना त्याचे दडपन वाटायला लागते. अशा स्थितीत जास्त विचार न करता आपला अभ्यास चालू ठेवावा. अभ्यासक्रम पूर्ण झालेला नसेल तर शिकवून झालेल्या धड्यांचा अभ्यास करावा. तसेच खेळ, झोप यांची सांगड घालून अभ्यास करावा. कोणताही तणाव न घेता अभ्यास केला तर यशाची हमी हमखास देता येते, असे तज्ज्ञ सांगतात.
