भारतातील अग्रणीय उद्योगपती मुकेश अंबनी त्याच्या विविध निर्णयांमुळे विशेष चर्चेत असतात.
आताही त्यांच्या एका निर्णयामुळे व्यापारी क्षेत्रात ते बरेच चर्चेत आले आहेत. रिलायन्स ग्रुपशी संबंधित एका महत्त्त्वाच्या उपकंपनीचं अस्तित्व संपुष्टात आलं आहे. रिलायन्सच्या संयुक्त उपक्रमातील या उपकंपनीची १०० टक्के हिस्सेदारी विकण्याचा निर्णय घेण्यात आला आहे. नुकताच हा व्यवहार पूर्ण झाला आहे. नेमकी कोणती कंपनी आहे जिच्यासंदर्भात एवढा मोठा निर्णय घेण्यात आला आणि त्याचा काय परिणाम होणार”
रिलायन्स ग्रुपची आलोक इंडस्ट्रीजचा निर्णय
मुकेश अंबानींच्या रिलायन्स ग्रुपच्या आलोक इंडस्ट्रीज लिमिटेडने आपल्या उपकंपनीमधील आपला हिस्सा विकला आहे. हा व्यवहार कंपनीची पूर्ण मालकीची उपकंपनी, आलोक इंडस्ट्रीज इंटरनॅशनल लिमिटेडमार्फत पार पाडण्यात आला. ही विक्री ९ ऑक्टोबर २०२६ रोजी पूर्ण झाली, ज्यामुळे मिलेटा ए.एस. ही आलोक इंडस्ट्रीजची उपकंपनी म्हणून अस्तित्वात राहिली नाही. याचा अर्थ, आलोक इंडस्ट्रीजचा आता या कंपनीमध्ये कोणताही हिस्सा राहिलेला नाही.
कंपनीने १६ डिसेंबर २०२५ रोजीच्या एका घोषणेमध्ये हे जाहीर केले होते की, ती मिलेटा ए.एस. मधील आपला हिस्सा विकणार आहे. आता, कंपनीने उपकंपनीमधील आपला हिस्सा विकला आहे आणि या महत्त्वपूर्ण निर्णयामुळे आलोक इंडस्ट्रीज लिमिटेडने आपल्या व्यवसाय पुनर्रचना योजनांमध्ये आणखी एक धोरणात्मक टप्पा गाठला आहे.
कंपनीने दिली माहिती
आलोक कंपनीने याबाबत महत्त्वपूर्ण माहिती दिली आहे. आलोक इंडस्ट्रीजने एक्सचेंज फाइलिंगमध्ये आपल्या १००% हिस्सेदारीच्या विक्रीची घोषणा केली. कंपनीने फाइलिंगमध्ये लिहिले आहे की, “आलोक इंडस्ट्रीज इंटरनॅशनल लिमिटेड, जी कंपनीची पूर्ण मालकीची उपकंपनी आहे, तिने कंपनीला कळवले आहे की, तिने ९ ऑक्टोबर २०२६ रोजी मिलेटा ए.एस. मधील आपल्या १००% इक्विटी हिस्सेदारीची विक्री पूर्ण केली आहे. परिणामी, मिलेटा ए.एस. ही आता कंपनीची उपकंपनी राहिलेली नाही.”
कोण आहेत आलोक इंडस्ट्रीचे मालक?
२०१९ मध्ये दिवाळखोरी निवारण प्रक्रिया पूर्ण झाल्यानंतर, आलोक इंडस्ट्रीज ही रिलायन्स इंडस्ट्रीज लिमिटेड (ज्याचा सुमारे ४०.०१% हिस्सा आहे) आणि जेएम फायनान्शियल असेट रिकन्स्ट्रक्शन कंपनी लिमिटेड (ज्याचा सुमारे ३४.९९% हिस्सा आहे) यांच्या संयुक्त मालकीची आहे.
आपले कामकाज सुव्यवस्थित करण्याच्या आणि आपल्या मुख्य गोष्टींवर फोकस करण्याच्या मोठ्या धोरणाचा भाग म्हणून आलोक इंडस्ट्रीज इंटरनॅशनल लिमिटेडने मिलेटा ए.एस.च्या विक्रीचा मार्ग मोकळा केला. कंपनीचा उद्देश गैर-मुख्य मालमत्ता आणि उपकंपन्या विकून आपली संसाधने एकत्रित करणे आणि वस्त्रोद्योग क्षेत्रात आपले स्थान मजबूत करणे हा आहे.
