पंतप्रधान नरेंद्र मोदी निवडक विद्यार्थी, शिक्षक आणि पालकांसोबत संवाद साधणार आहेत. राजभवनांमध्ये देशातील वेगवेगळ्या राज्यांमधील हे पालक, शिक्षक आणि विद्यार्थी उपस्थित राहतील, असे केंद्र सरकारने सोमवारी जाहीर केले आहे. परीक्षा पे चर्चा कार्यक्रमाअंतर्गत पंतप्रधान नरेंद्र मोदी परीक्षेच्या काळामध्ये तणाव कसा हाताळावा यासंदर्भात मार्गदर्शन करणार आहेत.
पत्रकारांना शिक्षणमंत्री धर्मेंद्र प्रधान यांनी दिलेल्या माहितीनुसार यासंदर्भात सर्व मुख्यमंत्र्यांना आणि राज्यपालांना पत्र लिहिणार आहेत. मागील परीक्षा पे चर्चाच्या कार्यक्रमांना सर्वच राज्यांकडून सकारात्मक प्रतिसाद मिळाला होता. तसाच प्रतिसाद यंदाही मिळावा, असे शिक्षण मंत्र्यांनी म्हटलं आहे.
परीक्षा पे चर्चा’ या कार्यक्रमाचे २०१८ पासून आयोजन केले जाते. यंदा त्याचे पाचवे वर्ष असून हा कार्यक्रम १ एप्रिल रोजी आयोजित केला जाणार आहे. पंतप्रधान नरेंद्र मोदी ताल्कातोरा स्टेडिममधून विद्यार्थ्यांना संबोधित करणार असून देशभरातील वेगवेगळ्या राजभवनांमध्ये निवडक उपस्थितांसोबत पंतप्रधान डिजीटल माध्यमातून संवाद साधणार आहेत. मागील वर्षी करोनामुळे सरकारने हा कार्यक्रम ऑनलाइन पद्धतीने घेतला होता.
हा कार्यक्रम केंद्र सरकारकडून निधी दिल्या जाणाऱ्या संस्थांमध्ये, वैद्यकीय आणि नर्सिंग महाविद्यालयांमध्ये, मनुष्यबळ आणि विकास मंत्रालयाअंतर्गत येणाऱ्या संस्थांमध्ये तसेच इतर संस्थांमध्ये लाइव्ह दाखवला जाणार आहे.
राज्यपालांसोबत त्या त्या राज्याच्या राजभवनांमध्ये मोजक्या विद्यार्थ्यांना हा कार्यक्रम पाहता येणार असल्याचे शिक्षणंत्र्यांनी म्हटले आहे. मुलांचा ताण दूर झाला पाहिजे याबद्दल कोणाचेही दुमत नसल्यामुळेच मागील वर्षी सर्व राज्यांनी सहकार्य केले, असे प्रधान यांनी पत्रकार परिषदेमध्ये सांगितले. या संवादाचे रुपांतर लवकरच लोक चळवळीमध्ये होईल, अशी अपेक्षाही केंद्रीय शिक्षणंत्र्यांनी व्यक्त केली.
