मुंबईकरांसाठी आनंदाची बातमी आहे. उकाड्याने हैराण झालेल्या मुंबईकरांचा प्रवास गारेगार होणार आहे. आता मुंबईकरांना एसी लोकलने (AC Local) प्रवास करता येणार आहे. एसी लोकलचा प्रवास महाग असल्यामुळे हा प्रवास मुंबईकरांना परवडणारा नव्हता. त्यामुळे एसी लोकलला मुंबईकरांकडून कमी प्रतिसाद मिळत होता. पण आता एसी लोकलचा प्रवास आजपासून स्वस्त झाला आहे. रेल्वे प्रशासनाने एसी लोकलच्या तिकीट (AC Local Ticket) दरात कपात करण्याचा निर्णय घेतला आहे. त्यामुळे उकाड्याने हैराण झालेल्या मुंबईकरांना खूप आनंद झाला आहे.
मुंबईकरांचा आजपासून एसी लोकलचा प्रवास स्वस्त झाला आहे. रेल्वेने एसी लोकलच्या तिकीट दरात कपात करण्याचा निर्णय घेतला आहे. रेल्वे प्रशासनाचा हा निर्णय आजपासून लागू झाला आहे. जवळपास एसी लोकलचे तिकीटाचे पैसे निम्म्यापेक्षा कमी झाले आहे. आता 5 किमीपर्यंतच्या प्रवासासाठी एसी लोकलचे तिकिट 30 रुपये असणार आहे. याआधी हा तिकीट दर 65 रुपये होता. त्यासोबतच फर्स्ट क्लासने प्रवास करणाऱ्या मुंबईकरांसाठी देखील आनंदाची बातमी आहे. कारण फर्स्ट क्लास वर्गाच्या तिकीट दरात देखील कपात करण्यात आली आहे.
मुंबईतील एसी लोकलचे तिकीट दर हे जास्त असल्याने मुंबईकर त्याने प्रवास करण्यास टाळाटाळ करत होते. तसंच, काही वेळा एसी लोकलने प्रवास करणाऱ्या प्रवाश्यांची संख्या देखील फार कमी होती. ऐन गर्दीच्या वेळी देखील एसी लोकल रिकाम्या धावत असे त्यामुळे रेल्वे प्रशासनाने एसी लोकलच्या तिकीट दरात घट करावी अशी मागणी प्रवाश्यांकडून करण्यात आली होती. त्यानंतर आता रेल्वे प्रशासनाने एसी लोकलच्या तिकीट दरात 50 टक्क्यांची घट केली आहे. त्यामुळे मुंबईकरांना गारेगार लोकलमधून प्रवास करता येणार आहे.
दरम्यान, लोकलच्या फर्स्ट क्लासच्या तिकीट दरामध्ये देखील कपात करण्यात आल्यामुळे प्रवाश्यांना आनंद झाला आहे. लोकलच्या फर्स्ट क्लासच्या तिकीट दरामध्ये करण्यात आलेली कपात आजपासून लागू झाली आहे. सध्या फर्स्ट क्लासचे ठाणे ते सीएसएमटीचे फर्स्ट क्लासचे तिकीट 140 रुपये असून मासिक पासची किंमत 755 रुपये इतकी आहे. रेल्वेच्या तिकीट दरामधील कपातीच्या मोठ्या निर्णयानंतर 140 रुपयांचे तिकीट आता 85 रुपयांपर्यत म्हणजे सुमारे 50 टक्क्यांपर्यंत कमी करण्यात आले आहे. एसी लोकल आणि फर्स्ट क्लासच्या मासिक पासच्या दरात कोणतीही कपात करण्यात आलेली नाही ते दर आधीप्रमाणेच आहेत.
जाणून घ्या तिकीटाचे जुने आणि नवीन दर –
वेस्टर्न रेल्वेवर तिकीट दर किती? (जुने दर आणि नवीन दर) –
मुंबई सेंट्रल – एसी लोकलचे तिकीट 65 वरुन 35 रुपये. तर फर्स्ट क्लासचे तिकीट 50 रुपयांवरुन 25 रुपये.
दादर – एसी लोकलचे तिकीट 90 रुपयांवरुन 50 रुपये. तर फर्स्ट क्लासचे तिकीट 70 रुपयांवरुन 40 रुपये.
वांद्रे – एसी लोकलचे तिकीट 90 रुपयांवरुन 50 रुपये. फर्स्ट क्लासचे तिकीट 70 रुपयांवरुन 40 रुपये.
अंधेरी – एसी लोकलचे तिकीट 135 रुपयांवरुन 70 रुपये. फर्स्ट क्लासचे तिकीट 105 रुपयांवरुन 60 रुपये.
बोरिवली – एसी लोकलचे तिकीट 180 रुपयांवरुन 95 रुपये. फर्स्ट क्लासचे तिकीट 140 रुपयांवरुन 85 रुपये.
भाईंदर – एसी लोकलचे तिकीट 190 रुपयांवरुन 100 रुपये. फर्स्ट क्लासचे तिकीट 150 रुपयांवरुन 90 रुपये.
वसई रोड – एसी लोकलचे तिकीट 210 रुपयांवरुन 105 रुपये. फर्स्ट क्लासचे तिकीट 165 रुपयांवरुन 100 रुपये.
नालासोपारा – एसी लोकलचे तिकीट 220 रुपयांवरुन 115 रुपये. फर्स्ट क्लासचे तिकीट 170 रुपयांवरुन 100 रुपये.
विरार – एसी लोकलचे तिकीट 220 रुपयांवरुन 115 रुपये. तर फर्स्ट क्लासचे तिकीट 170 रुपयांवरुन 100 रुपये.
मध्य रेल्वेवर तिकीट दर किती? (जुने दर आणि नवीन दर) –
भायखळा – एसी लोकलचे तिकीट 65 रुपयांवरुन 35 रुपये. फर्स्ट क्लासचे तिकीट 50 रुपयांवरुन 25 रुपये.
दादर – एसी लोकलचे तिकीट 65 रुपयांवरुन 35 रुपये. फर्स्ट क्लासचे तिकीट 50 रुपयांवरुन 25 रुपये.
कुर्ला – एसी लोकलचे तिकीट 135 रुपयांवरुन 70 रुपये. फर्स्ट क्लासचे तिकीट 105 रुपयांवरुन 60 रुपये.
घाटकोपर – एसी लोकलचे तिकीट 135 रुपयांवरुन 70 रुपये. फर्स्ट क्लासचे तिकीट 105 रुपयांवरुन 60 रुपये.
मुलुंड – एसी लोकलचे तिकीट 180 रुपयांवरुन 95 रुपये. फर्स्ट क्लासचे तिकीट 140 रुपयांवरून 85 रुपये.
ठाणे – एसी लोकलचे तिकीट 180 रुपयांवरुन 95 रुपये. फर्स्ट क्लासचे तिकीट 140 रुपयांवरुन 85 रुपये.
दिवा – एसी लोकलचे तिकीट 190 रुपयांवरुन 100 रुपये. फर्स्ट क्लासचे तिकीट 150 रुपयांवरुन 90 रुपये.
डोंबिवली – एसी लोकलचे तिकीट 205 रुपयांवरुन 105 रुपये. फर्स्ट क्लासचे तिकीट 160 रुपयांवरुन 95 रुपये.
कल्याण – एसी लोकलचे तिकीट 210 रुपयांवरुन 105 रुपये. फर्स्ट क्लासचे तिकीट 165 रुपयांवरुन 100 रुपये.
