सततच्या वाढत्या महागाईमुळे त्रस्त झालेल्या सर्वसामान्यांना आणखी एक धक्का बसला आहे. सर्वसामान्यांच्या खिशाला आणखी कात्री लागणार आहे. कारण तेल कंपन्यांनी पुन्हा एलपीजी गॅस सिलेंडरच्या दरामध्ये वाढ केली आहे. त्यामुळे घरगुती गॅस सिलेंडरसोबतच कमर्शियल गॅस सिलेंडरच्या दरामध्ये वाढ झाली आहे. आता देशात घरगुती गॅस सिलिंडर 1000 रुपये पार झाला आहे. तर घरगुती गॅस सिलेंडर व्यतिरिक्त कमर्शियल गॅस सिलेंडरही महाग झाला आहे.
घरगुती गॅस सिलेंडर 1000 रुपये पार
मिळालेल्या माहितीनुसार, तेल कंपन्यांनी केलेल्या दरवाढीनुसार आज घरगुती एलपीजी गॅस सिलेंडरच्या दरात 3 रुपये 50 पैशांनी वाढ झाली आहे. त्यानंतर देशात घरगुती एलपीजी गॅस सिलेंडरचा दर 1000 च्या पुढे गेला आहे. घरगुती गॅस सिलेंडरच्या किमतीत वाढ झाल्यानंतर आजपासून 14.2 किलोच्या घरगुती एलपीजी गॅस सिलेंडरसाठी दिल्ली आणि मुंबईमध्ये राहणाऱ्या नागरिकांना 1003 रुपये मोजावे लागणार आहेत. तर कोलकात्यामध्ये राहणाऱ्या नागरिकांना 1029 रुपये तर चेन्नईमध्ये राहणाऱ्यांसाठी 1018.5 रुपये मोजावे लागणार आहेत.
कमर्शियल गॅस सिलेंडर आणखी महागला
घरगुती एलपीजी गॅस सिलेंडर व्यतिरिक्त कमर्शियल एलपीजी गॅस सिलेंडरच्या दरामध्ये देखील वाढ झाली आहे. कमर्शियल गॅस सिलेंडर देखील 8 रुपयांनी महाग झाला आहे. आजपासून 19 किलो वजनाच्या सिलेंडरसाठी दिल्लीत 2354 रुपये, कोलकात्यात 2454 रुपये, मुंबईत 2306 रुपये आणि चेन्नईमध्ये 2507 रुपये मोजावे लागणार आहेत. 7 मे रोजी कमर्शियल गॅस सिलेंडर 10 रुपयांनी स्वस्त झाला होता. त्यानंतर आता त्यामध्ये 8 रुपयांनी वाढ करण्यात आली आहे.
