ताजी बातमी ऑनलाईन टीम
मनुका खाल्ल्याने आरोग्याला अनेक प्रकारे फायदा होतो हे तुम्हाला माहिती असेलच. परंतु मनुक्याचे पाणी देखील आरोग्यासाठी अतिशय फायदेशीर असते हे तुम्हाला माहिती आहे का? नियमितपणे मनुक्याचे पाणी प्यायल्यास आरोग्याशी संबंधित अनेक समस्या दूर होऊ शकतात. त्यामुळे सहज उपलब्ध होणाऱ्या आणि इतर ड्रायफ्रूट्सच्या तुलनेत स्वस्त असलेल्या मनुक्याच्या फायद्यांविषयी आपल्याला माहिती असणे आवश्यक आहे. आज या लेखाच्या माध्यमातून आम्ही तुम्हाला मनुक्याचे पाणी प्यायल्यास आरोग्यासाठी काय फायदे होतात हे सांगणार आहोत.
मनुक्याचे पाणी पिण्याचे फायदे
सकाळी रिकाम्या पोटी मनुक्याचे पाणी प्यायल्याने आरोग्याला आवश्यक पोषक तत्वे मिळतात. यात असलेले फायटो न्यूट्रिएंट्स, अँटिऑक्सिडंट्स आणि व्हिटॅमिन ई शरीरासाठी आवश्यक असतात. मनुक्याचे पाणी प्यायल्याने शरीर अँटिऑक्सिडंट्स आणि पोषक तत्व पूर्णपणे शोषून घेते.
तुम्हाला अ‍ॅसिडिटीचा त्रास असेल तर मनुक्याचे पाणी प्यायल्याने तुम्हाला आराम मिळेल. अ‍ॅसिडिटीवर नियंत्रण ठेवायचे असेल तर एक ग्लास मनुका पाणी प्यावे. मनुक्याच्या पाण्यात दाहक-विरोधी गुणधर्म असतात आणि त्यामुळे आतड्यांचे कार्य सुधारते.
मनुका पाणी पचनसंस्था देखील मजबूत करते. सकाळी रिकाम्या पोटी मनुका पाणी प्यायल्याने गॅस आणि बद्धकोष्ठतेची समस्या दूर होते. मनुकामध्ये फायबरचे प्रमाण जास्त असते, फायबर आतड्याची हालचाल सुलभ करते. तसेच शरीरात साचलेली विषारी द्रव्ये बाहेर काढण्यास मदत होते.
मनुक्यात भरपूर प्रमाणात आढळणारे आयर्न शरीरातील अशक्तपणा दूर करण्यासाठी प्रभावी ठरते. तसेच अ‍ॅनिमियाची समस्या टाळण्यासाठी देखील हा प्रभावी उपाय आहे.
रोज एका ग्लास मनुक्याचे पाणी प्यायल्यास शरीराला व्हिटॅमिन सी आणि अँटीऑक्सिडंट घटक मिळतात. यामुळे केसांना पोषण मिळते आणि कोंडा, जळजळ इत्यादी समस्या दूर होण्यास मदत होते.
मनुक्याचे पाणी दात आणि हाडांच्या समस्या दूर करण्यासाठी देखील खूप उपयुक्त ठरते. मनुक्याच्या पाण्यात आढळणारे कॅल्शियम दातांचे इनॅमल मजबूत करते आणि हाडे मजबूत करण्यासाठी देखील उपयुक्त असते.
(टीप : लेखात दिलेला सल्ला ही सामान्य आणि उपलब्ध माहिती आहे. हे तज्ञांचे मत नाही. अधिक माहितीसाठी डॉक्टरांचा सल्ला नक्की घ्यावा)
