माहेरी प्रसुतीसाठी चालली होती महिला, पण तिला काय माहित बाळ जगात येण्याआधीच…

ताजी बातमी ऑनलाईन टीम

बुलढाण्यात भीषण अपघाताने एकच खळबळ माजली आहे. आयशरने ट्रॅव्हल्सला जोरदार धडक दिल्याने भीषण अपघात होऊन चार जणांचा जागीच मृत्यू झाल्याची घटना बुलढाण्यात घडली आहे. सर्वात हृदयद्रावक म्हणजे मयतांमध्ये 9 महिन्यांच्या गरोदर महिलेचाही समावेश होता. अंजली आकाश जाधव असे मयत महिलेचे नाव आहे. सदर बस सूरतहून नागपुरला चालली होती. मात्र बुलढाणा जिल्ह्यातील मलकापूर बायपास रोडवर बसचा टायर पंक्चर झाला अन् एका मातेच्या स्वप्नांचा चक्काचूर झाला. मयतांमध्ये गरोदर महिला, ट्रॅव्हलचा चालक, आयशरचा चालक आणि क्लिनर यांचा समावेश होता.

टायर पंक्चर झाल्याने बस रस्त्याच्या कडेला उभी होती
महिंद्रा ट्रॅव्हल्सची बस सूरतहून 50 प्रवाशांना घेऊन नागपुरच्या दिशेने रवाना झाली. मात्र बुलढाणा जिल्ह्यात मलकापूर शहरातील बायपास रोडवर ट्रॅव्हल्सचे टायर पंक्चर झाले. चालकाचे बस रस्त्याच्या कडेला उभी केली आणि टायरचे पंक्चर काढू लागला. यावेळी बसमधील सर्व प्रवाशीही खाली उतरले आणि रस्त्याच्या कडेला गप्पा मारत बसले होते. इतक्यात भरधाव आयशर ट्रॅव्हलच्या दिशेने येताना सर्वांनी पाहिला. यानंतर सर्व प्रवासी उठून साईडला पळाले.

गरोदरपणामुळे अंजलीला पटकन उठता आले नाही आणि…
मात्र महिला 9 महिन्यांची गरोदर असल्याने तिला पटकन उठता आले नाही. इतक्यात नियतीने आपला डाव साधला आणि आयशर ट्रॅव्हल चालकाला चिरडत महिलेच्या पायावरुन जात दुभाजकावरील पोलवर धडकले. यात ट्रॅव्हलचा चालक, आयशरचा चालक आणि क्लिनर जागीच ठार झाले. तर जखमी महिलेला तात्काळ आधी मलकापूर आणि नंतर बुलढाणा रेफर करण्यात आले. मात्र बुलढाणा सामान्य रुग्णालयात उपचार सुरू असताना तिचा दुर्दैवी मृत्यू झाला.

आई-वडिलांसोबत प्रसुतीसाठी गावी चालली होती
अंजली जाधव ही दिड वर्षाचा मुलगा आणि पतीसह वाशिम जिल्ह्यात आपल्या सासरी राहत होती. अंजलीचे पतीशी भांडण झाले होते. यामुळे गेल्या सहा महिन्यांपासून अंजली आपल्या आई-वडिलांसोबत सूरत येथे राहत होती. अंजली आई-वडिलांसोबत तेथे मोलमजुरीचे काम करत होती. अंजलीला आता 9 महिना लागल्याने तिचे आई-वडिल तिला घेऊन त्यांच्या मूळगावी बडनेरा येथे प्रसुतीसाठी घेऊन चालले होते. त्यांच्यासोबत त्यांचे नातेवाईक आणि अंजलीचा दिड वर्षाचा मुलगाही होता.