आशिया चषकात आजपासून सुपर 4 स्टेजमधील सामन्यांना सुरुवात, ‘या’ चार संघांमध्ये रंगणार सहा सामने!

आशिया चषकात (Asia Cup) आजपासून सुपर 4 फेरीच्या (Super 4) सामन्यांना सुरुवात होणार आहे. या स्पर्धेत एकूण सहा संघ सहभागी झाले होते. त्यापैकी भारत, पाकिस्तान, श्रीलंका आणि बांगलादेश हे संघ सुपर 4 साठी पात्र ठरले आहेत. तर नेपाळ (Nepal) आणि अफगाणिस्तान (Afghanistan) हे संघ आशिया चषकातून बाहेर पडले आहेत. सुपर 4 मधील पहिला सामना आज बांगलादेश (Bangladesh) आणि पाकिस्तान (Pakistan) यांच्यात रंगणार आहे.

सुपर-4 स्टेजमध्ये एकूण 6 सामने खेळवले जातील. यानंतर गुणतालिकेतील टॉप दोन संघांमध्ये अंतिम सामना रंगणार आहे. सुपर-4 स्टेजमध्ये 10 सप्टेंबर रोजी भारत आणि पाकिस्तान संघ पुन्हा एकदा आमनेसामने येणार आहेत. याआधी 2 सप्टेंबर रोजी दोन्ही पारंपरिक प्रतिस्पर्धी संघ समोरासमोर आले होते, परंतु पावसामुळे तो सामना रद्द झाला होता. परिणामी दोन्ही संघांना एक-एक गुण मिळाला होता.

भारत आणि पाकिस्तान हे दोन्ही संघ ग्रुप-ए मधून सुपर-4 राऊंडमध्ये दाखल झाले आहेत. भारत आणि पाकिस्तान यांच्याकडे प्रत्येकी तीन गुण आहेत. या ग्रुपमधून नेपाळचा संघ बाहेर पडला आहे. दुसरीकडे श्रीलंका आणि बांगलादेश हे दोन संघ ग्रुप-बीमधून सुपर-4 राऊंडमध्ये पोहोचले आहेत. या ग्रुपमधून अफगाणिस्तानला सुपर-4 राऊंडमध्ये पोहोचता आलं नाही. श्रीलंकन संघ 4 गुणांसह सुपर-4 राऊंडमध्ये पोहोचला आहे. श्रीलंकेनेबांगलादेश आणि अफगानिस्तानला पराभूत केलं होतं. तर बांगलादेशचा संघ दोन गुणांसह सुपर-4 राऊंडमध्ये पोहोचला आहे. शाकिब अल हसनच्या संघाला श्रीलंकेविरुद्ध पराभवाचा सामना करावा लागला होता. जर बांगलादेशने अफिगाणिस्तानला पराभूत केलं होतं.

6 सप्टेंबर – पाकिस्तान विरुद्ध बांगलादेश – लाहोर

9 सप्टेंबर – श्रीलंका विरुद्ध बांगलादेश – कोलंबो

10 सप्टेंबर – पाकिस्तान विरुद्ध भारत – कोलंबो

12 सप्टेंबर – भारत विरुद्ध श्रीलंका – कोलंबो

14 सप्टेंबर – पाकिस्तान विरुद्ध श्रीलंका – कोलंबो

15 सप्टेंबर – भारत विरुद्ध बांगलादेश – कोलंबो

17 सप्टेंबर – अंतिम सामना – कोलंबो.

पाकिस्तान आणि बांगलादेश यांच्यातील सुपर-4 चा सामना लाहोरमध्ये झाल्यानंतर आशिया चषकातील उर्वरित सगळे सामने कोलंबोच्या के आर प्रेमदासा स्टेडियममध्ये खेळवले जाणार आहे. पल्लेकेलेप्रमाणेच कोलंबोमधील सामन्यांनावर पावसाचं सावट आहे. अशा परिस्थितीत सामने रद्द होण्याचीही शक्यता आहे.