गेल्या काही वर्षांमध्ये देशातील महागाईने उच्चांक गाठला आहे, ज्यामुळे सामान्यांना दैनंदिन गरजा पूर्ण करण्यासाठी खिशातील पैसा पूरत नाही. एकीकडे सरकार आणि आरबीआय महागाईवर नियंत्रण मिळवण्यासाठी प्रयत्नशील आहे, तर दुसरीकडे जागतिक अस्थिरता जनतेची चिंता वाढवू शकते. परिणामी आगामी काळात तुमच्या घराचे बजेटबिघडू शकते.
देशाच्या अर्थव्यवस्थेवर अजूनही महागाईचे आव्हान कायम असून केंद्र सरकार आणि रिझर्व्ह बँक ऑफ इंडिया (आरबीआय) याबाबत हाय अलर्टवर आहे. अर्थ मंत्रालयाच्या मासिक आर्थिक अहवालात असे म्हटले आहे. तथापि, आंतरराष्ट्रीय बाजारात कच्च्या तेलाच्या दरात झालेली पडझड आणि कोअर इन्फ्लेशनमधील सततच्या घसरणीमुळे पुढील काळात महागाईचा दबाव कमी होण्याची शक्यता आहे.
खाद्यतेल, तांदूळ महागण्याची शक्यता
किमतीत अलीकडेच झालेली घसरण आणि मूळ चलन वाढीतील सततची घसरण, यामुळे महागाईचा दबाव कमी होण्यास मदत झाल्याचेही अहवालात स्पष्ट करण्यात आले आहे.
ऑक्टोबर कोअर रिटेल चलनवाढीचा दर चार महिन्यातील निचांक म्हजे ४.८७ टक्क्यांवर घसरला होता. त्यामुळे सलग दुसऱ्या महिन्यात महागाईचा दर आरबीआयने ठरवलेल्या २ ते ६ टक्क्यांच्या मर्यादेतच राहिला. मात्र, अन्न- धान्य महागाईचा दर किंचित वाढीसह ६.६१ टक्क्यांवर पोहोचला असून अन्न-धान्यातील महागाई आटोक्यात येणे आवश्यक आहे, असे सरकारचे मत आहे. किरकोळ महागाई कमी करण्यासाठी गेल्या काही वर्षात केंद्र सरकारने गहू, तांदूळ आणि कांद्याच्या
निर्यातीवर बंदी घालण्यापासून ते स्वस्त दरात टोमॅटो विकण्यापर्यंत अनेक पावले उचलली. तथापि, अजूनही चिंता कायम असून मागील आठवड्यात रिझर्व्ह बँकेने आपले मासिक बुलेटिनमध्ये म्हटले होते की, सणासुदीच्या काळातील मागणी उत्साहवर्धक आहे आणि ग्राहकांची भावनाही ‘उत्साही’ आहे. पण भारताला अजूनही मोठा पल्ला गाठायचा आहे आणि महागाईवर अद्याप नियंत्रण मिळवता आलेले नाही.
अर्थ मंत्रालयाच्या अहवालात जागतिक मंदीच्या काळात ठोस देशांतर्गत मागणीमुळे भारतीय अर्थव्यवस्था ‘विलक्षण लवचिक’ राहिली असल्याचाही पुनरुच्चार करण्यात आला आहे. आर्थिक वर्ष २०२३- २४ मध्ये देशाची अर्थव्यवस्था ६.५ टक्क्यांनी जीडीपी विकास दर नोंदवेल असा सरकार आणि रिझर्व्ह बँकेचा अंदाज आहे. तथापि बाजाराची अपेक्षा ६ टक्के जवळ आहे. तथापि, जुलै-सप्टेंबर तिमाहीसाठी जीडीपी वाढ, ज्याचा डेटा ३० नोव्हेंबर रोजी जारी केला जाईल, आरबीआयच्या अंदाजापेक्षा (६.५%) जास्त असू शकतो.
