भारतीय रेल्वेने प्रवास करणाऱ्यांची संख्या लाखोंच्या संख्येने आहे. रेल्वे प्रवाशांना विविध सुविधा देण्याचे प्रयत्न करत असते. ऑनलाईनच्या या युगात प्रवाशांना तिकीट काढण्यासाठी लांबच्या लांब रांगेत उभे राहण्याची गरज राहिली नाही. रेल्वे आरक्षण तिकीट ज्याप्रमाणे आयआरसीटीसीच्या वेबसाईटवरुन काढता येते, त्याचप्रमाणे साधारण तिकीट, प्लॅटफॉर्म तिकीट आणि मासिक पास घरी बसून काढता येणार आहे. यासाठी असणारी पाच किलोमीटरची अट रद्द करण्यात आली आहे. यूटीएस अ‍ॅपवरुन ही सुविधा सुरु करण्यात आली आहे. तसेच या पद्धतीने तिकीट काढल्यास तीन टक्के बोनसही मिळणार आहे.
यू.टी.एस.अ‍ॅपवरुन सुविधा
रेल्वे मंत्रालयाने मोबाइल अ‍ॅप्लिकेशन यू.टी.एस.वरुन सुविधा दिली आहे. त्यासाठी प्ले स्टोरवरुन यू.टी.एस. (अनरिझव्हड तिकीट सिस्टम) डाऊनलोड करावे लागले. त्यानंतर त्याच्यावर लॉगीन केल्यावर तुम्हाला कधीही जनरल तिकीट, पास आणि प्लॅटफॉर्म तिकीट काढता येणार आहे. हे तिकीट काढण्यासाठी 3 टक्के बोनस देण्यात येणार आहे. त्यासाठी रांगेत थांबण्याची गरज नाही. सुट्या पैशांची कटकट राहणार नाही. वेळेची बचत होणार आहे. तसेच या अ‍ॅपमुळे पी.एन.आर. स्टेट्स, हॉटल बुकिंग, ट्रेनचे रनिंग स्टेट्स, सीट उपलब्धता, आलटरनेटिव्ह ट्रेन ही माहिती मिळणार आहे.
यापूर्वी हा होता नियम
यूटीएस अ‍ॅपसाठी यापूर्वी पाच किलोमीटरची मर्यादा होती. स्टेशनच्या परिसरात पाच किलोमीटरच्या आतच हे तिकीट काढता येत होते. आता ही मर्यादा रद्द करण्यात आली आहे. तुम्ही किती अंतरावर असल्यावर हे तिकीट काढू शकता. आरक्षण तिकीटासारखे घरी बसून जनरल तिकीट यूटीएसवर काढता येणार आहे.
यू.टी.एस. ऑन मोबाइल अ‍ॅप अ‍ॅड्रॉयड, आई.ओ.एस. आणि विंडोज ऑपरेटिंग सिस्टमवर मोफत डाऊनलोड करता येते. या अ‍ॅपमधून तिकीटाचे पेमेंट करण्यासाठी बॅकिंग किंवा व्हॅलेटचा वापर करता येतो. जनरल तिकीट काढण्यासाठी असणाऱ्या लांबच्या लांब रांगेत उभे राहण्यापेक्षा मोबाईलवर तिकीट काढणे आता सोपे झाले आहे.
