इचलकरंजी
हुपरी येथील कलाप्पाण्णा आवाडे जवाहर शेतकरी सहकारी साखर कारखान्याचे संस्थापक चेअरमन सहकार महर्षि कलाप्पाण्णा आवाडे (दादा) यांच्या 93 व्या वाढदिवसानिमित्त कारखान्याच्या कार्यस्थळावर रक्तदान शिबीर, वृक्षारोपण, इयत्ता 10 वी आणि 12 वीतील 75 टक्केपेक्षा जादा गुण मिळविलेल्या कर्मचार्‍यांच्या मुला- मुलींना कारखाना व कामगार संघटनेच्यावतीने शिष्यवृत्ती वाटप आदी विविध कार्यक्रमाचे आयोजन करण्यात आले होते. सर्व कार्यक्रम केन कमिटीचे चेअरमन डॉ. राहूल आवाडे, व्हाईस चेअरमन बाबासो चौगुले, कार्यकारी संचालक मनोहर जोशी, कामगार कल्याण मंडळ गट कार्यालय कोल्हापूरचे अधिकारी विजय शिंगाडे व सचिन खराडे याच्या हस्ते पार पडले.
यावेळी बोलताना डॉ. राहूल आवाडे यांनी, दादांनी कायमच सर्वसामान्य जनतेच्या भल्याचा विचार केला असल्यामुळे अनेक सहकारी व शैक्षणिक संस्थांची उभारणी केली. इचलकरंजीत बेंदूर कमिटीपासून सुरूवात करून खासदारकीपर्यंत दादांनी अनेक पदे भूषविली व त्यातून समाजाच्या विकासाची कामे केल्याचा उल्लेख केला. कामगार कल्याण अधिकारी विजय शिंगाडे यांनी, सहकार महर्षि आवाडेदादांनी अगदी जुन्या काळात भविष्याची गरज ओळखून शिक्षणाचे महत्व समाजाला पटवून दिले. भागातील जास्तीत जास्त मुलांना शिक्षणाच्या प्रवाहात आणण्याचा प्रयत्न केला. महाराष्ट्र कामगार कल्याण मंडळामार्फत जवाहरच्या कर्मचार्‍यांना व त्यांच्या पाल्यांना जास्तीत जास्त शिष्यवृत्ती मिळवून देण्यात कारखाना आघाडीवर आहे. कारखाना व कामगार संघटनासुध्दा शिक्षणासाठी हातभार लावत आहे. कामगारांच्या मुलांनी पुढील इंजिनियरींग व मेडीकलसाठी महाराष्ट्र कामगार मंडळाकडून राबविण्यात येणार्‍या योजनेचा लाभ घ्यावा असे सांगितले.
कार्यकारी संचालक मनोहर जोशी यांनी, आवाडेदादा म्हणजे एक वटवृक्षच आहेत. जवाहर परिवाराकरीता त्यांनी चार दशके अविरत कष्ट केले आहेत. त्यामुळे आज शेतकरी व कामगारांना एका चांगल्या संस्थेचा भाग होता आला. कामगारांच्या मुलांनी मिळालेल्या संधीचे सोने करावे व आपल्या कुटुंबाचे नांव उज्वल करावे, असे सांगितले.
यावेळी दादांच्या वाढदिवसानिमित्त कारखाना कार्यस्थळावर 600 झाडांचे वृक्षारोपण करण्यात आले. तसेच तुलशी ब्लड बँक जयसिंगपूर व लायन्स ब्लड बँक इचलकरंजी यांचे सहकार्याने रक्तदान शिबीर घेण्यात आले. या शिबीरामध्ये 100 रक्तदात्यांनी स्क्तदान केले. कार्यक्रमाचे प्रास्ताविक जवाहर साखर कामगार संघटनेचे अध्यक्ष सर्जेराव हळदकर यांनी केले. आभार सदस्य सुरेश पोवार यांनी मानले. सूत्रसंचालन आण्णासो गिरीबुवा यांनी केले.
