महाराष्ट्रात विधानसभा निवडणुका तोंडावर येऊन ठेपल्या आहेत. त्यातच आता पंतप्रधान नरेंद्र मोदी हे आज वर्धा जिल्ह्याच्या दौऱ्यावर येत आहेत. पंतप्रधान नरेंद्र मोदी यांच्या उपस्थितीत आज पी एम विश्वकर्मा योजनेचा वर्षपूर्ती सोहळा साजरा होत आहे. या सोहळ्याला पंतप्रधान मोदी उपस्थित राहणार आहे. त्यासोबतच या कार्यक्रमाला राज्यपाल, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार हे देखील उपस्थित राहणार आहेत. आज सकाळी 11 वाजता या कार्यक्रमांना सुरुवात होणार आहे.
पंतप्रधान नरेंद्र मोदी हे आज वर्धा दौऱ्यावर येत आहेत. आज साधारण पावणे अकराच्या सुमारास पंतप्रधान मोदी यांचे नागपूर विमानतळावर आगमन होईल. त्यानंतर लगेचच ते हेलिकॉप्टरने वर्ध्यात येतील. यानंतर पंतप्रधान मोदी हे स्वावलंबी मैदानावर पोहोचतील. यावेळी ते विविध योजनांचे लोकार्पण करतील. या कार्यक्रमानंतर साधारण १२.३० च्या सुमारास पंतप्रधान मोदी यांचे भाषण होईल. यानंतर १ च्या सुमारास मोदी हे वर्ध्यातून हेलिकॉप्टरद्वारे नागपुरात रवाना होतील आणि त्यानंतर ते दिल्लीला रवाना होतील.
विविध योजनांचे लोकार्पण करणार
पंतप्रधान नरेंद्र मोदी यांच्या उपस्थितीत आज पी एम विश्वकर्मा योजनेचा वर्षपूर्ती सोहळा साजरा होत आहे. यावेळी ते राष्ट्रीय पीएम विश्वकर्मा कार्यक्रमात सहभागी होतील. यानतंर मोदी हे पीएम विश्वकर्मांच्या लाभार्थ्यांना किट वाटप करतील. या कार्यक्रमाला १५ हजार विश्वकर्मा, ५ हजार IT प्रशिक्षणार्थी, २० हजार महिला बचत गटाच्या महिला सहभागी होणार आहेत. या कार्यक्रमानंतर पंतप्रधान नरेंद्र मोदी यांच्या हस्ते अमरावतीतील पीएम मित्र टेक्सटाईल पार्क आणि अॅरेल पार्कची पायाभरणी करणार आहेत. त्यासोबतच या कार्यक्रमादरम्यान पंतप्रधान यांच्या नावे एक टपाल तिकीट जारी केले जाणार आहे. तसेच महाराष्ट्र सरकारच्या आचार्य चाणक्य कौशल्य विकास केंद्र योजनेचा शुभारंभही यावेळी केला जाणार आहे.
मोठ्या प्रमाणात रोजगार उपलब्ध होणार
पंतप्रधान नरेंद्र मोदी यांच्या हस्ते अमरावतीतील पुण्यश्लोक अहिल्यादेवी होळकर महिला स्टार्ट अप योजनेचा शुभारंभ देखील होणार आहे. वर्ध्याच्या स्वावलंबी मैदानावर हा संपूर्ण कार्यक्रम पाहायला मिळणार आहे. पीएम मित्र टेक्सटाईल पार्कमुळे अमरावतीच्या प्रकल्पात 10 हजार कोटींची गुंतवणूक होणार आहे. यात तब्बल 3 लाख लोकांना मोठ्या प्रमाणात रोजगार उपलब्ध होणार आहे. याचा फायदा विदर्भातील युवकांना होणार आहे.
दरम्यान गेल्या काही दिवसांपासून पंतप्रधान नरेंद्र मोदी हे सातत्याने महाराष्ट्रात दौरे करत आहेत. काही दिवसांपूर्वी पंतप्रधान नरेंद्र मोदी हे पालघर दौऱ्यावर आले होते. यावेळी त्यांनी 76,000 कोटी रुपये खर्चाच्या वाढवण बंदर प्रकल्पाचे भूमिपूजन केले होते. यानंतर येत्या २६ सप्टेंबरला पंतप्रधान नरेंद्र मोदी हे पोहरादेवी येथे विकास कामांचे लोकार्पण करणार आहेत. महाराष्ट्रातील विधानसभा निवडणुकीच्या पार्श्वभूमीवर हा कार्यक्रम अत्यंत महत्त्वाचा मानला जात आहे. यासाठी प्रशासनाकडून जय्यत तयारी करण्यात आली आहे.
