खासगी क्षेत्रातील देशातील दुसरी सर्वात मोठी बँक ICICI Bank च्या तीन कार्यालयावर काल जीएसटी पथक धडकले. या पथकातील अधिकाऱ्यांनी (GST Officers) येताच शोध मोहीम राबवली. त्यामुळे बँक जीएसटीच्या रडारवर आल्याची चर्चा सुरू झाली आहे. महाराष्ट्र जीएसटी अधिकाऱ्यांनी तपास अभियान राबविल्यानंतर बँकेने रात्री उशीरा या कारवाईची माहिती शेअर बाजाराला दिली. या माहितीनुसार, जीएसटी अधिकाऱ्यांनी राज्यातील त्यांच्या तीन कार्यालयात ही शोध मोहीम राबवली. जीएसटी विभागाकडून अजूनही तपास सुरू आहे. तर त्यांना आवश्यक तो डेटा देण्यात बँकेने सहकार्याची भूमिका घेतली आहे.
दुसर्‍या तिमाहीत जोरदार कमाई
महाराष्ट्र जीएसटी अधिनियम 2017 चे कलम 67(1) आणि (2) अंतर्गत जीएसटी अधिकाऱ्यांनी बँकेत ही कारवाई सुरू केली आहे. आयसीआयसीआय बँकेने दुसऱ्या तिमाहीत जोरदार मुसंडी मारली असतानाच जीएसीटीने तपास मोहीम राबवल्याने अनेकांच्या भुवया उंचावल्या आहेत. बँकेने जुलै ते सप्टेंबर या दुसर्‍या तिमाहीत वार्षिक आधारावर 14.5 टक्के असा निव्वळ नफा नोंदवला आहे. या कालावधीत आयसीआयसीआय बँकेला 11,746 कोटींचा नफा झाला. अर्थात ही शोध मोहीम का राबवण्यात येत आहे? त्यामागील कारणं काय याचा खुलासा बँकेने केला नाही. बँकेने केवळ जीएसटी कार्यालयाकडून होणाऱ्या तपास मोहिमेला दुजोरा दिला आहे.
आज शेअर बाजारात दिसू शकतो परिणाम
बुधवारी झालेल्या या घडामोडींचा परिणाम शेअर बाजारात दिसून शकतो. ICICI Bank Share वर आज काय परिणाम होतो हे आता काही मिनिटातच दिसून येईल. शेअर बाजारातील तज्ज्ञ सुद्धा या वृत्तानंतर बँकेच्या शेअरवर काय परिणाम होईल, याचा अंदाज बांधत आहेत. NYSE वर बँकेचा ADR 4 डिसेंबर रोजी 0.36 टक्क्यांपेक्षा अधिक बंद झाला. इंट्राडे उच्चांकात बँकेच्या शेअरला कमान सांभाळता आलेली नाही.
बुधवारच्या आकडेवारीनुसार, आयसीआयसीआय बँकेचा शेअरने हिरवा झेंडा फडकवला होता. बाजारात बँकेचा शेअर तेजीत होता. कालच्या व्यापारी सत्रात हा शेअर 1302.60 रुपयांवर उघडला. तो 1320 रुपयांपर्यंत उसळला. पण दुपारच्या सत्रात या शेअरला उसळी घेण्यासाठी पुरेसे बळ मिळाले नाही. हा शेअर 1315.60 रुपयांवर बंद झाला. काल तेजीच्या वेळी आयसीआयसीआय बँकेचे मार्केट कॅप 9.29 लाख कोटी रुपयांवर पोहचले.
