राज्यातील पहिली ते आठवीच्या विद्यार्थ्यांसाठी प्रधानमंत्री पोषण शक्ती निर्माण योजनेंतर्गत दिल्या जाणाऱ्या पोषण आहारातील प्रतिविद्यार्थी खर्चात वाढ करण्यात आली आहे. याअंतर्गत पहिली ते पाचवीच्या विद्यार्थ्यांसाठी प्रतिविद्यार्थी ७४ पैसे, तर सहावी ते आठवीच्या विद्यार्थ्यांसाठी १ रुपया १२ पैसे दरवाढ केली आहे.
या नवीन दरवाढीचे कार्यान्वयन १ मार्च २०२५ पासून होईल.
शालेय शिक्षण विभागाने याबाबतचा शासन निर्णय जाहीर केला आहे. पोषण आहारात पहिली ते पाचवीच्या विद्यार्थ्यांना ४५० उष्मांक आणि १२ ग्रॅम प्रथिने, तर सहावी ते आठवीच्या विद्यार्थ्यांना ७०० उष्मांक आणि २० ग्रॅम प्रथिने प्रदान केले जातात. याप्रमाणे, केंद्र सरकारने ७ ऑक्टोबर २०२२ रोजी निर्णय घेतल्याप्रमाणे, २०२२-२३ आर्थिक वर्षाच्या दरम्यान आहार खर्चात ९.६ टक्के वाढ केली होती. त्यानंतर १५ नोव्हेंबर २०२२ रोजीच्या शासन निर्णयानुसार, आहार खर्च मर्यादेत वाढ केली होती.
सद्य परिस्थितीतील नवीन दरानुसार, पहिली ते पाचवीच्या विद्यार्थ्यांसाठी प्रतिविद्यार्थी ६ रुपये १९ पैसे, तर सहावी ते आठवीच्या विद्यार्थ्यांसाठी ९ रुपये २९ पैसे या प्रमाणे दर ठरवण्यात आले आहेत. या खर्चात धान्य, इंधन, आणि भाजीपाला यांसाठी वेगवेगळी विभागणी करण्यात आली आहे. शहरी भागात, केंद्रीय स्वयंपाकगृह प्रणालीमार्फत आहार पुरवठा करणाऱ्यांना याप्रमाणेच अनुदान मिळेल.
