जुन्या वाहनांची फिटनेस, वाहन नोंदणी, ग्रीन टॅक्स शुल्कात रस्ते वाहतूक व परिवहन मंत्रालयाने वाढ केली आहे. त्याचा फटका देशातील वाहनधारकांना बसणार असून नूतनीकरणावेळी जादा पैसे मोजावे लागणार आहे.
यामुळे नुतनीकरण, वाहन नोंदणीत घट होण्याची शक्यता आहे.प्रदूषण कमी करण्यासाठी केंद्रीय रस्ते वाहतूक व परिवहन मंत्रालयाने सर्व प्रकारच्या वाहनांचे दहा आणि पंधरा वर्षांपुढील नूतनीकरण, फिटनेस प्रमाणपत्र शुल्कात वाढ केली आहे.
रस्त्यावर अपघाताचे प्रमाण वाढतल्यामुळे फिटनेस बंधनकारक केले आहे. याबाबत माल व प्रवासी वाहतूक संघटनेचे अध्यक्ष डॉ. बाबा शिंदे म्हणाले की, शुल्कवाढीला सर्व वाहतूकदारांनी विरोध दर्शविला होता, मात्र त्याबाबत कोणतीही चर्चा अथवा लेखी सूचना न देता अचानक केंद्राने दरवाढ केलेली आहे.
नागरिकांनी जुन्या गाड्या वापरू नयेत म्हणून केंद्राने शुल्कात वाढ केली आहे. नूतनीकरण शुल्क वाढविल्याने ते भरणे अशक्य ठरणार आहे. मुळातच जुन्या गाड्यांची किंमत फार असणार नाही. केवळ भांडवलदारांसाठी हा निर्णय घेतल्याचे आमचे मत आहे.
नवे शुल्क
– १५ वर्षांपर्यंतच्या दुचाकीसाठी ६०० रुपये, १५ ते २० वर्षांच्या वाहनांसाठी दीड हजार, तर २० वर्षांपुढील दुचाकीसाठी तीन हजार रुपये.
– १५ वर्षांपर्यंतच्या चारचाकीसाठी ८०० , १५ ते २० वर्षांच्या चारचाकीसाठी ४५०० , २० वर्षांवरील वाहनांचा फिटनेस खर्च तब्बल नऊ हजार रुपये.
– १५ ते २० दरम्यानच्या जड वाहनांसाठी सहा हजार रुपये तर, २० वर्षांपुढील जड वाहनांसाठी २८ हजार रुपये शुल्क केले आहे.
“वाहन नुतनीकरण शुल्कामध्ये दरवाढ केल्याने वाहनधारकांना मोठा आर्थिक फटका बसणार आहे. देशात कोट्यावधी वाहने असून त्याचा हजारो कोटींचा फटका बसणार आहे. सरकारने केलेली दरवाढ नियमबाह्य आहे. दरवाढ करताना वाहनधारकांचा विचार करणे आवश्यक आहे.”
