हिंदू धर्मात अमावस्या तिथीला विशेष स्थान आहे, परंतु जेव्हा ही तिथी सोमवारी येते, तेव्हा तिला ‘सोमवती अमावस्या’ म्हटले जाते. 2026 मध्ये ज्येष्ठ अधिक मास असल्यामुळे उद्या येणारी ही सोमवती अमावस्या अत्यंत दुर्मिळ आणि महाफलदायी मानली जात आहे.
सोमवार हा भगवान शिवशंकराचा वार आहे आणि अमावस्या ही पितरांना समर्पित असते, त्यामुळे या दिवशी शिवजी आणि पूर्वज दोघांचाही दुहेरी आशीर्वाद मिळवण्याची सुवर्णसंधी भाविकांना मिळणार आहे. उद्या कोणती अशी कामे केल्याने तुम्हाला फायदा होईल जाणून घ्या.
पवित्र स्नान आणि सूर्यदेवाला अर्घ्य
सोमवती अमावस्येच्या दिवशी विधीवत स्नानाला अनन्यसाधारण महत्त्व आहे. शास्त्रानुसार या दिवशी सकाळी लवकर म्हणजेच ब्रह्म मुहूर्तावर उठणे सर्वात उत्तम मानले जाते. जर तुम्हाला एखाद्या पवित्र नदीत जाऊन स्नान करणे शक्य नसेल, तर काळजी करण्याचे कारण नाही. उद्या सकाळी घरातच आपल्या अंघोळीच्या पाण्यात गंगाजलाचे काही थेंब आणि थोडे काळे तीळ मिसळून स्नान करावे. यामुळे पवित्र नदीत स्नान केल्याइतकेच पुण्य मिळते आणि शरीरातील नकारात्मक ऊर्जा नष्ट होते. तसेच स्नानानंतर तांब्याच्या पात्रात शुद्ध जल घेऊन, त्यात कुंकू, लाल फुले आणि अक्षता टाकून “ॐ सूर्याय नमः” या मंत्राचा जप करत सूर्यदेवाला जल अर्पण करावे. यामुळे व्यक्तीचा समाजात मान-सन्मान वाढतो आणि आरोग्याशी संबंधित समस्या दूर होतात.
पिंपळाच्या झाडाची पूजा आणि पूर्वजांचे स्मरण
हिंदू धर्मात पिंपळाच्या झाडामध्ये त्रिदेवांचा म्हणजेच ब्रह्मा, विष्णू आणि महेश यांचा वास असतो, असे मानले जाते. तसेच पिंपळाच्या वृक्षावर पितरांचाही वास असतो. उद्या सकाळी पिंपळाच्या झाडाच्या मुळाशी दूध, गंगाजल आणि काळे तीळ मिश्रित जल अर्पण करावे. त्यानंतर झाडाजवळ गाईच्या तुपाचा किंवा मोहरीच्या तेलाचा दिवा लावावा. असे केल्याने कुंडलीतील पितृदोष, शनीचा साडेसातीचा त्रास दूर होतो आणि पूर्वजांच्या आशीर्वादाने कुटुंबात अपार धन-धान्याची वृद्धी होते.
तुळशी मातेची पूजा आणि प्रदक्षिणेचा महाउपाय
तुळशीला साक्षात लक्ष्मीचे रूप मानले जाते. सोमवती अमावस्येच्या दिवशी विवाहित महिलांनी आपल्या पतीच्या दीर्घायुष्यासाठी आणि अखंड सौभाग्यासाठी तुळशीची पूजा आवर्जून करावी. उद्या सकाळी तुळशीच्या रोपट्याला हळद-कुंकू वाहून दिवा लावावा. त्यानंतर तुळशीभोवती 108 वेळा प्रदक्षिणा घालावी. प्रत्येक प्रदक्षिणेच्या वेळी तुळशीजवळ एखादे फळ, मिठाई, सुका मेवा किंवा नाणे ठेवावे नंतर या वस्तू गरिबांना दान कराव्यात. या उपायामुळे माता लक्ष्मी अत्यंत प्रसन्न होते. ज्या घरांमध्ये पैशांची चणचण असते, कर्ज वाढलेले असते किंवा आर्थिक आव्हाने असतात, तिथे धनसंपत्तीचे नवीन मार्ग मोकळे होतात आणि तिजोरी कधीही खाली होत नाही.
