राज्यात मॉन्सूनची प्रगती बघायला मिळतंय. सर्वदूर पाऊस कोसळत आहे. गेल्या दोन दिवसांपासून मुंबईसह उपनगरांमध्ये मुसळधार पाऊस सुरू आहे. रात्रभर पाऊस सुरू होता. काल अनेक सखल भागात पाणी साचले. गेल्या काही दिवसांपासून राज्यात पेरण्या रखडल्या होत्या. अखेर पेरण्यांच्या कामांना शेतकरी लागले आहेत. यंदा राज्यात समाधानकारक पाऊस नसल्याचे सांगितले जात होते. जुलै महिन्याच्या पहिल्याच दिवसापासून राज्यात दमदार पावसाने हजेरी लावली. केरळमध्ये दोन दिवस उशिरा मॉन्सून दाखल झाल्यानंतर 15 दिवस तो अरबी समुद्रातच रेंगाळत होता. अखेर दमदार मॉन्सून हजेरी लावताना दिसत आहे. गेल्या दोन दिवसांपासून मुसळधार पाऊस सुरू आहे. त्यामध्येच भारतीय हवामान विभागाने रायगड आणि पुण्याला आज रेड अलर्ट जारी केला. मुंबईसह अन्य काही जिल्ह्यांमध्ये आज पावसाचा ऑरेंज अलर्ट जारी करण्यात आला. यासोबतच गरज असेल तरच आज घराबाहेर पडा.
पावसामुळे पाणी साचल्याने मुंबई सबवे आज बंद करण्यात आला. मुंबईसह उपनगरांमध्ये जोरदार पावसाची बॅटिंग बघायला मिळतंय. काल दिवसभर पावसाची संतधार पुण्यात होती. रात्रीपासून पावसाचा जोर वाढला. त्यामध्येच आज सकाळपासून जोरदार पावसाला सुरूवात झाली. अतिमहत्वाच्या कामाशिवाय घराबाहेर पडणे टाळा, असे आवाहन प्रशासनाकडून केले जात आहे. पुढील 3 तास मुसळधार पावसाचा इशारा मुंबईसह उपनगर, ठाणे आणि पालघरला मंत्रालयाकडून देण्यात आला.
अंधेरी परिसरात रात्रभर मुसळधार पावसाची जोरदार बॅटिंग सुरु आहे. अंधेरीतील पूर्व आणि पश्चिम भागाला जोडणारा महत्वाचा मार्ग असणार अंधेरी सब वे बंद करण्यात आला आहे. साकीनाका येथील घटनेनंतर पालिकेला जाग आली असून मुंबई पालिकेचे कर्मचारी नियुक्त करण्यात आले आहेत. मुसळधार पावसामुळे अंधेरी परिसरात अनेक भागात पाणी साचले आहे.
हवामान विभागाने ऑरेंज अलर्ट जारी केला असून नागरिकांना सतर्क राहण्याचा इशारा दिला आहे. कोकणातही पावसाने मोठा धुमाकूळ घातला. पावसाचे तांडव बघायला मिळतंय. मुंबईत पुढील 4 दिवस मुसळधार पाऊस कायम राहणार आहे. राज्यातील इतरही भागात पाऊस सुरू आहे. बीड, हिंगोली, जालना, परभणी, लातूर, नांदेड या जिल्ह्यांमध्येही विजांच्या कडकाडाटासह पाऊस होण्याचा अंदाज आहे.
