पीयूसी अद्ययावत करा अन्यथा कारवाईला सामोरे जा, कोल्हापुरात उद्यापासून तपासणी मोहीम

ताजी बातमी ऑनलाईन टीम

कोल्हापूर : आपल्या वाहनांची वाहन वायू प्रदूषण नियंत्रण प्रमाणपत्र आणि कर भरणा, योग्यता प्रमाणपत्र नसेल तर अशा वाहनधारकांवर उद्या, गुरुवारपासून प्रादेशिक परिवहन अधिकारी कार्यालय कारवाईचा बडगा उगारणार आहे.

वाढत्या वायू प्रदूषणावर नियंत्रण ठेवण्यासाठी सरकार सातत्याने विविध उपक्रम, कारवाई अशा माध्यमातून कार्यरत असते. त्याचाच एक भाग म्हणून प्रादेशिक परिवहन कार्यालयातर्फे आज, गुरुवारपासून शहरासह जिल्ह्यभरात विशेष वाहन तपासणी मोहीम राबविणार आहे. यासाठी शहर वाहतुक नियंत्रण शाखेची मदत घेतली जाणार आहे. यात वाहन वायू प्रदूषण नियंत्रण प्रमाणपत्र, योग्यता प्रमाणपत्र, कर भरणा पावती अद्ययावत हवी. ती नसल्यास अशा वाहनधारकांवर दंडात्मक कारवाई केली जाणार आहे.