आयपीएल 2025 मेगा लिलाव 24 आणि 25 नोव्हेंबर रोजी सौदी अरेबियाच्या जेद्दाहमध्ये पार पडणार आहे. यासाठी सर्वच फ्रेंचायझींनी कंबर कसली आहे. पंजाब किंग्सच्या पर्समध्ये सर्वाधिक पैसे असून मोठी बोली लावण्याची शक्यता आहे. पंजाब किंग्सने फक्त दोन अनकॅप्ड प्लेयर्स रिटेन केले आहेत. इतर सर्व खेळाडूंना रिलीज केलं असून संपूर्ण संघ नव्याने बांधणार आहेत. पंजाब किंग्ससोबत दिल्ली कॅपिटल्स, लखनौ सुपर जायंट्स हे संघही नव्या कर्णधाराच्या शोधात आहेत. त्यामुळे संघाच्या कर्णधारासाठी लिलावात जोरदार रस्सीखेंच पाहायला मिळणार आहे. यंदाच्या मेगा लिलावात आतापर्यंतचे सर्व विक्रम मोडीत निघतील असं दिसत आहे. मागच्या पर्वात मिनी लिलावात कोलकाता नाईट रायडर्सने मिचेल स्टार्कसाठी 24.75 कोटी रुपये मोजले होते. यंदाच्या मेगा लिलावात हा विक्रम मोडीत निघेल अशी शक्यता आहे. मिचेल स्टार्कलाही कोलकात्याने रिलीज केलं आहे. त्यामुळे पुन्हा एकदा मेगा लिलावात दिसणार आहे. पण त्याला पुन्हा एकदा इतकी मोठी रक्कम मिळणं कठीण दिसत आहे.
कोलकाता नाईट रायडर्सने मागच्या पर्वात जेतेपद जिंकलं पण त्यात मिचेल स्टार्कचा वाटा काही खास नव्हता. त्याच्यापेक्षा कमी पैसे घेणाऱ्या खेळाडूंनी चांगली कामगिरी केली होती. त्यामुळे मिचेल स्टार्कला तितका भाव मेगा लिलावात मिळणं कठीण आहे. दुसरीकडे, केएल राहुल, श्रेयस अय्यर आणि ऋषभ पंतसारखे दिग्गज खेळाडू मैदानात उतरले आहेत. हे तिन्ही खेळाडूंनी आयपीएलमध्ये कर्णधारपद भूषविलं आहे. त्यामुळे या तीन खेळाडूंवर खासकरून फ्रेंचायझींचा नजरा असतील. आरटीएम कार्डचं ऑप्शनही असल्याने काय होईल सांगता येत नाही.
मेगा लिलावात सर्वाधिक भाव हा विकेटकीपर बॅट्समन ऋषभ पंत खाऊन जाईल असं बोललं जात आहे. ऋषभ पंत सध्या चांगल्या फॉर्मात आहे. त्याने शतकी खेळी करत आपली चुणूक दाखवून दिली आहे. त्यामुळे ऋषभ पंतवर नजरा खिळल्या आहेत. खासकरून पंजाब किंग्स त्याला संघात घेण्यासाठी उत्सुक असल्याचं बोललं जात आहे. या माध्यमातून एकाच दगडात दोन शिकार करता येतील. आता पंजाब किंग्ससोबत कोण तगडी बोली लावणार याची उत्सुकता आहे.
