बँक ग्राहकांसाठी एक आनंदाची बातमी आहे. आता तुम्ही तुमच्या बँक खात्याला एक, दोन नव्हे तर तब्बल चार नॉमिनी म्हणजे वारसदार जोडू शकता. 1 नोव्हेंबर 2025 पासून बँक खात्यांमध्ये नॉमिनीबाबत नवीन नियम लागू होणार आहेत.
यामुळे ग्राहकांना अधिक सोयीचे होईल आणि आपत्कालीन परिस्थितीत पैसे मिळवणे सोपे आणि पारदर्शक होईल. अर्थ मंत्रालयाकडून गुरूवारी महत्त्वाचा निर्णय घेण्यात आला.
अर्थ मंत्रालयाचा निर्णय
अर्थ मंत्रालयाने गुरुवारी सांगितले की, बँकिंग कायदा (दुरुस्ती) अधिनियम, 2025 मधील महत्त्वाचे कलम 1 नोव्हेंबरपासून लागू होतील. या कायद्यात नॉमिनीबद्दल नवीन नियम आहेत. आता कोणताही बँक ग्राहक आपल्या खात्यासाठी, लॉकरसाठी किंवा सुरक्षित ठेवलेल्या वस्तूंसाठी जास्तीत जास्त चार नॉमिनी निवडू शकतो. बँकिंग कायद्यातील काही नियम लागू झाले आहेत. तर सेक्शन 10,11,12,13 एक नोव्हेंबरपासून लागू होणार आहेत.
नवीन नियमानुसार ग्राहकाकडे उपलब्ध झालेले पर्याय
नवीन नियमांनुसार, ग्राहक आपल्या बँक खात्यासाठी चार लोकांना नॉमिनी बनवू शकतो. उदाहरणार्थ, जर एखाद्या ग्राहकाने चार नॉमिनी निवडले आणि पहिला नॉमिनी हयात नसेल, तर आपोआप दुसरा नॉमिनी वारसदार बनेल. तसेच ग्राहक चारही नॉमिनींमध्ये पैशांची वाटणी किती टक्के करायची हे देखील ठरवू शकतो. जसे की प्रत्येकी 25 टक्के किंवा ग्राहकाच्या सोयीनुसार.
सेफ कस्टडी आणि लॉकरसाठीचे नियम
मंत्रालयाने सांगितले की, सेफ कस्टडी आणि लॉकरमध्ये ठेवलेल्या वस्तूंसाठी फक्त क्रमिक नॉमिनीची अनुमती असेल. याचा अर्थ, एका नॉमिनीच्या मृत्यूनंतरच दुसऱ्याला अधिकार मिळेल. सरकारचे म्हणणे आहे की, या बदलामुळे बँकिंग व्यवस्थेत एकरूपता, पारदर्शकता येईल आणि पैसे मिळण्याची प्रक्रिया वेगवान होईल. यामुळे ग्राहकांना त्यांच्या जमा केलेल्या पैशांचा वारसदार आपल्या मर्जीनुसार ठरवण्याची सोय मिळेल. वित्त मंत्रालयाच्या मते, हे नियम लागू झाल्यावर बँकांमध्ये नॉमिनीची प्रक्रिया अधिक पारदर्शक आणि प्रभावी होईल. यामुळे ठेवीदारांना त्यांच्या संपत्तीच्या वाटपात स्पष्टता आणि सुरक्षा दोन्ही मिळेल.
