ताजी बातमी ऑनलाईन टीम
देशात यंदा जून ते सप्टेंबर या कालावधीत सरासरीच्या तुलनेत 103 टक्के म्हणजेच सर्वसामान्य पाऊस पडणार आहे; तर सांगलीसह काही जिल्ह्यात 106 टक्के पावसाचा अंदाज आहे. मध्य महाराष्ट्र, मराठवाडा आणि विदर्भातील काही भागांत सरासरीपेक्षा अधिक पाऊस म्हणजेच 103 टक्के पाऊस होणार आहे, असा अंदाज हवामानशास्त्र विभागाने मंगळवारी (दि. 31) जाहीर केला.
नैऋत्य मोसमी पावसाचे म्हणजे मान्सूनचे नुकतेच केरळमध्ये आगमन झाले आहे. त्या पार्श्वभूमीवर भारतीय हवामानशास्त्र विभागाने मंगळवारी जून ते सप्टेंबर या कालावधीतील मोसमी पावसाचा अंदाज
जाहीर केला. पावसाचा हा अंदाज हवामानशास्त्र विभागाचे महासंचालक डॉ. मृत्युंजय मोहपात्रा यांनी दिल्लीत झालेल्या ऑनलाईन
पत्रकार परिषदेत जाहीर केला. हवामानशास्त्र विभागाने याआधी 14 एप्रिलला पावसाचा दीर्घकालीन अंदाज जाहीर केला होता. त्यानुसार देशात सरासरीच्या तुलनेत 99 टक्के पाऊस पडणार असल्याचे जाहीर करण्यात आले होते; परंतु सध्याची हवामानाची स्थिती लक्षात घेता पावसाच्या प्रमाणाचा अंदाज वाढविण्यात आला असून, तो 103 टक्के करण्यात आला आहे.
अर्थात, त्यामध्ये चार टक्के कमी-अधिक होण्याची शक्यताही गृहीत धरण्यात आली आहे. 1971 ते 2020 या कालावधीत भारतात पावसाची दीर्घकालीन सरासरी 87 सें.मी. आहे. या सरासरीच्या तुलनेत पावसाच्या या चार महिन्यांत 103 टक्के पाऊस देशात पडणार आहे.देशाबरोबरच महाराष्ट्राच्या बहुतांश भागांत पावसाळ्याच्या चार महिन्यांमध्ये सरासरीपेक्षा अधिक म्हणजे 103 टक्के पाऊस पडण्याची अधिक शक्यता आहे.
कोकण आणि किनारपट्टीच्या भागांसह पूर्व विदर्भात पावसाचे प्रमाण सर्वसाधारण असणार आहे, तर उत्तर महाराष्ट्र, पश्चिम महाराष्ट्र आणि मराठवाड्यातील बहुतांश भाग आणि विदर्भात तीन ते चार जिल्ह्यांमध्ये सरासरीपेक्षा अधिक पाऊस राहील.
