मिरज तालुक्यातील म्हैसाळ प्रकरणामध्ये अटकेत असलेल्या विजयनगर जिल्हा परिषदेच्या तीन शिक्षकांवर निलंबनाची कारवाई करण्यात आली. प्राथमिक शिक्षक बँकेचे नूतन संचालक शामगोंडा पाटील, अनिल बोराडे आणि शुभदा कांबळे ही निलंबन करण्यात आलेल्या शिक्षकांची नावे आहेत. जिल्हा परिषदेचे मुख्य कार्यकारी अधिकारी जितेंद्र डुडी यांनी बुधवारी निलंबनाची कारवाई केली.
म्हैसाळ येथील नऊजणांनी सामूहिक आत्महत्या केल्याचे प्रकरण उघडकीस आले आहे. याप्रकरणी पोलिसांनी म्हैसाळ येथील 25 खासगी सावकारांवर गुन्हा दाखल केला होता. त्यानंतर पोलीस तपासात धक्कादायक माहिती समोर आली आहे. त्या नऊजणांची आत्महत्या नसून हत्याकांड झाल्याचे समोर आले होते. दोघा मांत्रिकांनी हत्याकांड झाल्याची माहिती पुढे आली आहे.
दरम्यान, सावकारी प्रकरणात अटक केलेल्या 13 जणांमध्ये विजयनगर येथील जिल्हा परिषद शाळेतील तीन शिक्षकांचा समावेश असल्याची माहिती पुढे आली आहे. पोलिसांच्या अहवालानुसार शिक्षक अनिल बोराडे, शामगोंडा पाटील, शुभदा कांबळे यांना अटक असून दोन दिवसापेक्षा जास्त पोलीस कोठडी मिळाली आहे. त्यामध्ये प्राथमिक शिक्षक बँकेमध्ये नव्याने निवडून आलेले संचालक पाटील यांचाही समावेश आहे. पोलीस अहवालाच्या आधारावर जिल्हा परिषद मुख्य कार्यकारी अधिकारी डुडी यांनी तीनही शिक्षकांना निलंबीत केले आहे. संबधित शिक्षकांना पलूस पंचायत समिती येथे हजेरी लावण्यासाठी मुख्यालय दिले आहे. या सर्व शिक्षकांची खातेनिहाय चौकशी करण्यात येणार असल्याचेही डुडी यांनी सांगितले.
