गर्दी असलेल्या बसमध्ये चढून गर्दीचा फायदा घेत प्रवाशांच्या पर्समधील पैशांवर आणि दागिन्यांवर डल्ला मारणाऱ्या एका महाविद्यालयीन तरुणीस लक्ष्मीपुरी पोलीसांनी बेड्या ठोकल्या आहेत. प्रज्ञा उर्फ प्रतीक्षा दगडू निंबाळकर (वय २२) असे सदर तरुणीचे नाव असून तिच्याकडून चोरीतील दागिने आणि रोकड असा एक लाख १९ हजार रुपयांचा मुद्देमाल जप्त करण्यात आला आहे.
पोलिसांनी दिलेल्या माहिती नुसार, गेल्या काही महिन्यांपासून शहरात केएमटी बसमध्ये चढताना पर्सचोरी होण्याच्या घटना वाढल्या होत्या. यामुळे सदर गुन्हे करण्याऱ्यांवर कारवाई करत गुन्हे उघड करण्याचे आदेश पोलीस अधीक्षक शैलेश बलकवडे यांनी दिले होते. त्यानुसार अशा घटना रोखण्यासाठी आणि चोरट्यांचा शोध घेण्यासाठी लक्ष्मीपुरी पोलिसांची संशयितांवर नजर होती.
दरम्यान छत्रपती शिवाजी चौकातील बस स्टॉपवर संशयास्पद हालचाली करणारी प्रज्ञा उर्फ प्रतीक्षा निंबाळकर या तरुणीला पोलिसांनी ताब्यात घेतले. यावेळी अधिक चौकशी केली असता तिने पर्सचोरीची कबुली दिली. याबाबत आणखी चौकशी केली असता सदर संशयताने एकूण सहा चोऱ्या केल्या असल्याचे उघड झाले असून सदर संशयताकडून ८८,९५० रोख रक्कम आणि नऊ ग्रॅम वजनाचे सोन्याचे दागिने असा एकूण १,१९,०५० रुपये किमतीचा मुद्देमाल तरुणी कडून हस्तगत करण्यात आला आहे.(crime news)
शिवाय सदर तरुणीवर यापूर्वी मुंबई येथील अंधेरी रेल्वे पोलीस स्टेशन येथे पर्स चोरी केल्याचे गुन्हे देखील दाखल असून गेल्या एक वर्षापासून ती कोल्हापूरमध्ये बस मधून प्रवास करताना पर्स चोरी करत असल्याचे समोर आले आहे.
