जगप्रसिद्ध टी 20 क्रिकेट लीगपैकी एक असणाऱ्या इंडियन प्रीमियर लीगला सुरुवात झाली आहे. आयपीएल 2023 मध्ये एम एस धोनीच्या चेन्नई सुपरकिंग्सने तीन सामने खेळले असून यातील 2 सामन्यांत विजय मिळवला आहे.
12 एप्रिल रोजी चेन्नईचे होम ग्राउंड असलेल्या चेपॉक स्टेडीयमवर चेन्नई विरुद्ध राजस्थान रॉयल्स यांच्यात सामना पारपडले. परंतू यापूर्वीच चेन्नई सुपरकिंग्सवरून तामिळनाडूच्या विधानसभेत गदारोळ पाहायला मिळाला. मंगळवारी 11 एप्रिल रोजी तामिळनाडूच्या विधान सभेत पीएमकेच्या आमदाराने आयपीएलमधील चेन्नई सुपरकिंग्स टीम मध्ये एकही तामिळ खेळाडू नसल्याने आक्षेप नोंदवला. एवढेच नाही तर यावरून चेन्नई सुपरकिंग्सवर बंदी घालण्यात यावी असे मागणी केली.
तामिळनाडूच्या विधानसभेत खेळावरील अर्थसंकल्पीय चर्चेदरम्यान, धर्मपुरीचे पीएमके आमदार व्यंकटेश्वरन यांनी संबंधित मागणी केली. चेन्नई सुपरकिंग्स ही टीम तामिळनाडूला रिप्रेझेन्ट करत असली तरी त्यात तामिळ खेळाडूंना महत्व दिल जात नाही असा आरोप केला. आमदार व्यंकटेश्वरन म्हणाले, “तामिळनाडूमध्ये अनेक खेळाडू आहेत.
चेन्नई सुपर किंग्ज ही तामिळनाडूची राजधानी चेन्नईच्या नावावर आहे. तरी देखील संघात एकही तामिळ खेळाडू नसणे हे दुर्दैवी आहे. मुख्यमंत्री आणि क्रीडामंत्री यावर कारवाई करतील, याची मला खात्री आहे. तामिळनाडूत तमिळ लोकांना महत्त्व दिले नाही तर त्यांना इतरत्र कुठेही महत्व दिले जाणार नाही”. व्यंकटेश्वरन यांनी विधान सभेत उपस्थित केलेल्या मुद्द्यावर तामिळनाडू सरकारकडून कोणती पावले उचलली जातात हे पाहणं महत्वाचं ठरणार आहे.
