सकल मराठा समाजातर्फे कोल्हापुरात उद्यापासून साखळी उपोषण

ताजी बातमी ऑनलाईन टीम

कोल्हापूर : मराठा आरक्षणासाठी मनोज जरांगे पाटील यांनी सुरु केलेल्या उपोषणाला पाठिंबा म्हणून कोल्हापूर सकल मराठा समाजातर्फे उद्या, रविवार, दि. २९ ऑक्टोबरपासून रोज सकाळी १०.३० ते १ या वेळेत दसरा चौकातील छत्रपती राजर्षी शाहू महाराजांच्या पुतळ्याशेजारी रोज साखळी उपोषण करण्यात येणार आहे.

जरांगे पाटील यांने केलेल्या आवाहनानुसार सकल मराठा समाजाने मंत्र्यांना गावबंदी सुरु केली आहे. ती यापुढेही सुरु राहणार आहे. जरांगे पाटील यांच्या उपोषणाला पाठिंबा देण्यासाठी दसरा चौकात मंडप उभारण्यात आला आहे. या साखळी उपाषणादरम्यान मराठा समाजाचे आरक्षणासंदर्भात प्रबोधनही करण्यात येणार आहे.