यंदा संपूर्ण देशात सर्वत्र मुसळधार पाऊस (Rain In India) सुरु आहे. अनेक ठिकाणी नद्या- नाले ओसंडून वाहत आहेत तर काही शहरात पूरस्थिती निर्माण झाली आहे. हिमाचल प्रदेश आणि केरळमधीळ वायनाड येथे पावसामुळे भूस्सखलन होऊन अनेक नागरिकांना आपले प्राण गमवावे लागलेत. देशातील अनेक शहरात पावसाचा रेड अलर्ट देण्यात आला आहे. एकीकडे हे सगळं असताना आता भारतीय हवामान विभागाने ऑगस्ट आणि सप्टेंबर या मान्सूनच्या अखेरच्या २ महिन्यात सुद्धा सरासरी पेक्षा जास्त पाऊस कोसळणार असल्याचा अंदाज व्यक्त केलाय. त्यामुळे सप्टेंबर महिन्यातील पावसामुळे खरीप पिकांचं नुकसान होण्याची शक्यता आहे.
IMD ने देशात ऑगस्ट आणि सप्टेंबरमध्ये मान्सून सरासरी पेक्षा जास्त पडण्याचा अंदाज वर्तवला आहे. मात्र सप्टेंबरच्या शेवटी आणि ऑक्टोबरच्या सुरुवातीस हवामान कस राहते यावर खरीप पिकांचे भवितव्य अवलंबून असेल. ऊर्जा, पर्यावरण आणि पाणी परिषदेने (CEEW) या वर्षाच्या सुरुवातीला प्रकाशित केलेल्या अभ्यासानुसार, नैऋत्य मोसमी पावसाच्या विलंबाने माघार घेतल्याने भारतातील ४८ टक्क्यांहून अधिक तहसील किंवा उपजिल्ह्यांमध्ये गेल्या दशकात ऑक्टोबरच्या पावसात १० टक्क्यांहून अधिक वाढ झाली आहे. ऑगस्ट महिन्यातील एकूण वातावरणामुळे विविध पिकांच्या वाढीवर परिणाम होण्याची शक्यता आहे. या महिन्याच्या अखेरीस भारतीय मान्सूनसाठी अनुकूल मानल्या जाणाऱ्या ला नीनाची शक्यता ऑगस्ट आणि सप्टेंबरमध्ये वाढल्याचे हवामान खात्याने म्हटले आहे.
ला नीना 2024 च्या अखेरीपर्यंत सुरू राहण्याची अपेक्षा आहे. त्यामुळे त्याशिवाय, मान्सूनवर प्रभाव टाकणारा आणखी एक घटक असलेला हिंद महासागर द्विध्रुव (IOD) हा मान्सून हंगाम संपेपर्यंत ‘तटस्थ’ राहणे अपेक्षित आहे. भारतात ऑगस्ट आणि सप्टेंबरमध्ये पाऊस 422.8 मिमीच्या दीर्घकालीन सरासरीच्या 106 टक्के असेल. भारतामध्ये 1 जूनपासून सरासरी 445.8 मिमीच्या तुलनेत आतापर्यंत 453.8 मिमी नोंद झाली आहे. जुलैमध्ये जास्त प्रमाणात पाऊस पडल्याने यामध्ये दोन टक्क्यांनी वाढ झाली आहे. आयएमडीचे प्रमुख मृत्युंजय महापात्रा म्हणाले की, एजन्सीने भारताच्या पश्चिम किनारपट्टीवर महत्त्वपूर्ण पावसाच्या हालचालींसाठी नियमित अंदाज जारी केला होता आणि केरळसाठी 30 जुलै रोजी रेड अलर्ट जारी केला होता, ज्या दिवशी वायनाड जिल्ह्याला भूस्खलन झाला होता.
