विरार पूर्वेला मनवेलपाडा येथील विवांत हॉटेलमध्ये आज मोठा राडा झाला. भाजपचे सरचिटणीस विनोद तावडे यांना बहुजन विकास आघाडीच्या कार्यकर्त्यांनी घेरलं. त्यांच्यावर पाच कोटी रुपये घेऊन आल्याचा, पैसे वाटपाचा आरोप झाला. बविआचे कार्यकर्ते विनोद तावडे यांना जाब विचार होते. तुम्ही इथे का आलात?. हा सगळा राडा कॅमऱ्यासमोर झाला. दरम्यान आता विनोड तावडे यांची बाजू समोर आली आहे.
“नालासापोरा येथे आमदारांची बैठक सुरु होती. आदर्श आचारसंहिता आहे. मतदानाच्या दिवशी व्होटिंग मशीन कशी सील केली जाते, काही आक्षेप असतील तर कसे नोंदवायचे? मी त्यांना हे सांगण्यासाठी तिथे गेलो होतो” असं विनोद तावडे म्हणाले.
सीसीटीव्ही फुटेज तपासा’
“बहुजन विकास आघाडीचे हितेंद्र ठाकूर, क्षितिज ठाकूर यांना वाटलं की, मी तिथे पैसे वाटण्यासाठी आलोय. निवडणूक आयोग आणि पोलिसांना चौकशी करुदे. त्यातून सत्य काय ते समोर येईल. सीसीटीव्ही फुटेज तपासा. मी मागच्या 40 वर्षापासून राजकारणात आहे. हितेंद्र ठाकूर आणि क्षितिज ठाकूर यांना हे माहित आहे. पक्ष मला ओळखतो. निवडणूक आयोगाने निपक्षपाती चौकशी करावी” असं विनोद तावडे म्हणाले.
हितेंद्र ठाकूर काय म्हणाले?
“विनोद तावडे हे राष्ट्रीय नेते आहेत. राष्ट्रीय सरचिटणीस लाज-शरम कोळून प्याले आहेत. 48 तास आधी मतदारसंघ सोडायचा असतो, हे साधं माहित नाही आणि हे राज्याचे शिक्षण मंत्री होते” अशी टीका हितेंद्र ठाकूर यांनी केली. “त्यांनी मला 25 फोन केले. मला माफ कर, जाऊ द्या. प्लीज मला माफ कर. माझं चुकलं” असं विनोद तावडे म्हणाल्याच हितेंद्र ठाकूर यांनी दावा केला.
