तरुणींना वश करण्यासाठी प्रेमवीरांनी अघोरी कृत्य केले असून बाभळीच्या झाडाला दाभणाने मुलींचे फोटो लटकवले आहेत. तसेच लिंबू आणि काळ्या बाहुल्यांचाही त्यांनी वापर केला आहे.
आकुर्डे-महालवाडी (ता. भुदरगड) दरम्यानच्या कुराण नावाच्या शेतातील गवताच्या माळावर हा अघोरी जादूटोण्याचा प्रकार उघडकीस आला आहे. यामुळे परिसरात खळबळ उडाली आहे.
दहा एकराच्या विस्तीर्ण माळरानावर केवळ एकच बाभळीचे झाड आहे. या झाडावर तीन मुलींच्या फोटोवर लिंबू दाभणाने टोचलेले आढळले. तसेच झाडावर काळ्या बाहुल्याही अडकवलेल्या होत्या. एका बाहुलीवर युवतीचा फोटो होता, तर एका युवतीच्या आई, वडील आणि आजीचे फोटो झाडाच्या फांद्यांवर लटकवलेले होते. हा अघोरी प्रकार अमावस्येच्या मध्यरात्री घडल्याची शक्यता वर्तवली जात आहे. महालवाडी येथील ग्रामदैवताच्या यात्रेच्या निमित्ताने विविध स्पर्धांचे आयोजन करण्यासाठी ग्रामस्थ कुराण माळावर ग्राऊंड करण्यासाठी गेले होते. त्यावेळी त्यांना हा अघोरी प्रकार निदर्शनास आला. या घटनेची माहिती परिसरात पसरल्यानंतर बघ्यांनी आणि ग्रामस्थांनी घटनास्थळी गर्दी केली होती. अंधश्रद्धेला खतपाणी घालणार्‍या या घटनेमुळे नागरिकांमध्ये तीव- संताप व्यक्त होत आहे. संबंधित व्यक्तींचा शोध घेऊन त्यांच्यावर कडक कारवाई करावी, अशी मागणी ग्रामस्थांकडून होत आहे.
युवतींच्या ड्रेसची बटणेही
काळ्या बाहुल्यांबरोबरच युवतींचे फोटोही झाडाला बांधले असून दाभणामध्ये युवतींच्या ड्रेसची बटणेही काळ्या दोर्‍यामध्ये अडकली आहेत. या भीतीदायक प्रकाराची सर्वत्र चर्चा सुरू आहे.
