प्रधानमंत्री किसान सन्मान निधी योजनेअंतर्गत (PM Kisan Samman Nidhi Yojana) कोट्यवधी शेतकऱ्यांना दरवर्षी 6000 रुपयांची मदत दिली जाते. ही रक्कम थेट तीन समान हप्त्यांमध्ये शेतकऱ्यांच्या बँक खात्यात पाठवली जाते. आतापर्यंत सरकारने 19 हप्ते जारी केले आहेत आणि देशभरातील शेतकरी आता 20 व्या हप्त्याची आतुरतेने वाट पाहत आहेत. यावेळी आतापर्यंत 20 व्या हप्त्याशी संबंधित कोणतीही नवीन माहिती पीएम किसान पोर्टल किंवा मोबाईल अॅपवर शेअर केलेली नाही. यामुळे, पुढचा हप्ता कधी येईल याबद्दल शेतकऱ्यांमध्ये संभ्रम आहे.
शेवटचा हप्ता कधी आला?
सरकारने शेवटचा म्हणजे 19 वा हप्ता 24 फेब्रुवारी 2025 रोजी शेतकऱ्यांच्या खात्यात हस्तांतरित केला. त्यापूर्वी, 17 वा हप्ता 18 जून 2024 रोजी आला. आता 20 वा हप्ता जून 2025 मध्ये येईल अशी अपेक्षा होती, परंतु जुलै महिन्याचा अर्धा भाग उलटून गेला तरी हप्त्याबाबत कोणतीही अपडेट नाही.
या योजनेचा फायदा काय?
पीएम-किसान योजनेअंतर्गत, पात्र शेतकऱ्यांना दरवर्षी 6000 रुपये मिळतात. ही रक्कम वर्षातून तीन वेळा दर चार महिन्यांनी 2000 रुपयांच्या हप्त्यांच्या स्वरूपात दिली जाते. हे पैसे थेट शेतकऱ्यांच्या खात्यात डीबीटी (डायरेक्ट बेनिफिट ट्रान्सफर) द्वारे जातात.
शेतकऱ्यांनी काय करावे?
जर 20 व्या हप्त्याची रक्कम आतापर्यंत तुमच्या खात्यात आली नसेल, तर घाबरुन जाण्याची गरज नाही. सरकार लवकरच त्याबद्दल नवीन माहिती जारी करू शकते. अशा परिस्थितीत, शेतकरी बांधवांना वेळोवेळी पोर्टल तपासत राहण्याचा आणि त्यांच्या खात्याची स्थिती तपासण्याचा सल्ला देण्यात येत आहे.
यादीत तुमचे नाव कसे तपासाल?
सर्वप्रथम पीएम किसान pmkisan.gov.in च्या अधिकृत वेबसाइटवर जा.
होमपेजवर दिसणाऱ्या ‘पेमेंट सक्सेस’ विभागाच्या खाली असलेल्या पिवळ्या ‘डॅशबोर्ड’ बटणावर क्लिक करा.
आता तुमच्यासमोर व्हिलेज डॅशबोर्ड उघडेल. त्यात राज्य, जिल्हा, उपजिल्हा आणि पंचायतीची माहिती भरा.
यानंतर ‘रिपोर्ट मिळवा’ वर क्लिक करा आणि तुमचे नाव लाभार्थी यादीत आहे की नाही ते पहा.
सरकारचं शेतकऱ्यांना आवाहन
शेतकरी भाऊ आणि बहि‍णींनी पीएम किसान सन्मान निधी योजनेच्या नावावर सोशल मीडियावर पसरवण्यात येत असलेल्या खोट्या माहितीपासून सावध राहा. फक्त http://pmkisan.gov.in आणि @pmkisanofficial या वरुन मिळणाऱ्या अपडेटस वर विश्वास ठेवा. खोट्या लिंक, कॉल आणि मेसेजपासून दूर राहा, असं आवाहन शेतकऱ्यांना करण्यात आलं आहे. पीएम किसान सन्मान निधीच्या अपडेट अधिकृत सोशल मिडिया प्लॅटफॉर्म @pmkisanofficial वरुन मिळवा असं आवाहन करण्यात आलं आहे.
