राज्यातील सर्वच राजकीय पक्ष स्थानिक स्वराज्य संस्थांच्या तयारीत व्यस्त आहेत. अशातच आता शिवसेनेची ताकद वाढली आहे. जळगाव जिल्ह्यातील अमळनेर विधानसभा मतदारसंघाचे माजी आमदार शिरीष चौधरी आणि हिंगोली विधानसभा मतदारसंघाचे काँग्रेसचे माजी आमदार हरीभाऊ पाटील गोरेगावकर यांनी आज शिवसेनेत प्रवेश केला. शिवसेना मुख्य नेते एकनाथ शिंदे यांच्या प्रमुख उपस्थितीत हा पक्षप्रवेश सोहळा पार पडला. त्यामुळे भाजप आणि काँग्रेसला मोठा धक्का बसला आहे. याबाबत सविस्तर माहिती जाणून घेऊयात.
अमळनेरमध्ये शिवसेनेची ताकद वाढली.
गेल्या काही निवडणुकांमध्ये माजी अपक्ष आमदार शिरीष चौधरी यांचा भाजपला पाठिंबा होता. त्यामुळे आता अमळनेरमध्ये भाजपला मोठा धक्का बसला आहे. चौधरी स्थानिक कार्यकर्त्यांच्या राजकारणाला कंटाळून शिवसेनेत प्रवेश केल्याचे समोर आले आहे. चौधरी यांच्यासह उबाठा गटाचे अमळनेरचे माजी नगरसेवक गुलाब पाटील, माजी शहरप्रमुख प्रवीण पाठक, माजी प्रभारी नगराध्यक्ष अनिल महाजन, माजी सभापती श्रीराम चौधरी, माजी सभापती देविदास महाजन, माजी नगरसेवक पंकज चौधरी, महेश जाधव, किरण बागुल, बाळासाहेब संघनाशिव, साखरलाल महाजन आणि इतर असंख्य पदाधिकाऱ्यांनी हाती भगवा घेत शिवसेनेमध्ये प्रवेश केला. त्यामुळे स्थानिक स्वराज्य संस्थांच्या निवडणुकीच्या तोंडावर शिवसेनेची ताकद वाढली आहे.
हरीभाऊ पाटील गोरेगावकर यांचा शिवसेनेत प्रवेश
हिंगोली विधानसभा मतदारसंघाचे काँग्रेसचे माजी आमदार हरीभाऊ पाटील गोरेगावकर यांच्यासह माजी जिल्हा परिषद उपाध्यक्ष सुनील पाटील गोरेगावकर, माजी कृषी उत्पन्न बाजार समिती सभापती कांतराव हराळ, माजी शिक्षण सभापती भय्या देशमुख, माजी सभापती बाजीराव जुमडे, माजी उपसभापती मदन इंगोले, डॉ.आर.जी.कावरजे, द्वारकादास सारडा, न्यानोबा कवडे आणि असंख्य पदाधिकाऱ्यांनी शिवसेनेमध्ये प्रवेश केला आहे. त्यामुळे हिंगोलीतही शिवसेनेची ताकद वाढली आहे.
या पक्षप्रवेशाच्या कार्यक्रमाला पाणीपुरवठा मंत्री गुलाबराव पाटील, परिवहन मंत्री प्रताप सरनाईक, रोजगार हमी मंत्री भरतशेठ गोगावले, जलसंधारण मंत्री संजय राठोड, आमदार संतोष बांगर, आमदार किशोर आप्पा पाटील, आमदार चंद्रकांत सूर्यवंशी, जिल्हाप्रमख वासुदेव पाटील, शिवसेना सचिव संजय मोरे तसेच शिवसेना पदाधिकारी आणि शिवसैनिक मोठ्या संख्येने उपस्थित होते.
