पंतप्रधान नरेंद्र मोदी यांनी महाराष्ट्र काँग्रेसवर केलेल्या आरोपांविरोधात आज राज्यभरात काँग्रेसच्या वतीने निषेधात्मक आंदोलन करण्यात येत आहे. काँग्रेस प्रदेशाध्यक्ष नाना पटोले यांनी काल पत्रकार परिषदेतून या आंदोलनाचे सूतोवाच केले होते. राज्यातील शहरा-शहरातील भाजप कार्यालयाबाहेर निदर्शने केले जातील असे वक्तव्य नाना पटोले यांनी केले होते. त्यानुसार, परळीमध्येही आज भाजप नेत्या आणि राष्ट्रीय सचिव पंकजा मुंडे यांच्या कार्यालयाबाहेर काँग्रेस कार्यकर्त्यांनी घोषणाबाजी केली. काँग्रेसने आंदोलन करत काळे झेंडे दाखवून निदर्शने केली. पंतप्रधान मोदींनी महाराष्ट्राच्या जनतेची माफी नाही मागितल्यास यापेक्षा तीव्र आंदोलन करण्याचा येईल, असा इशाराही देण्यात आला.
पंतप्रधान नरेंद्र मोदी यांनी लोकसभेत बोलताना म्हटले की, कोरोनाच्या पहिल्या लाटेदरम्यान देश लॉकडाऊनचे पालन करत होता. मात्र काँग्रेसवाले परिस्थिती बिघडण्याची वाट पहात होते. जागतिक आरोग्य संघटना सांगत होती की, लोकांनी आहे तिथेच थांबावे. परंतु काँग्रेसने तेव्हा महाराष्ट्रातील परराज्यातील लोकांना त्यांच्या राज्यात जाण्यासाठी मोफत तिकिटे वाटली जात होती. हे खूप मोठे पाप होते, असा गंभीर आरोप नरेंद्र मोदी यांनी केला होता.
