शनीदेव हे वैदिक ज्योतिषशास्रानुसार न्याय व कर्म देवता म्हणून ओळखले जातात. शनीची चाल बदलताच सर्व १२ राशींवर त्याचा शुभ- अशुभ प्रभाव होत असतो. प्रत्येक व्यक्तीच्या कर्माचा हिशोब शनी महाराज ठेवत असतात व त्यानुसार चांगल्या कर्मास चांगले व वाईटास वाईट असे फळ प्रत्येक राशीच्या व्यक्तीस मिळते. ज्योतिषशास्त्रानुसार शनिवार हा शनीचा वार मानला जातो त्यामुळेच शनीच्या पूजेसाठी सुद्धा शनिवारचे विशेष महत्त्व आहे.
१७ जानेवारी २०२३ ला शनीने गोचर करून तब्बल ३० वर्षांनी आपल्या स्वराशीत म्हणजेच कुंभ राशीत प्रवेश केला होता. २०२५ पर्यंत शनी कुंभेतच स्थित असणार आहेत. ग्रह बदल झाला नसला तरी मागील दीड वर्षात शनीने अनेकदा नक्षत्र परिवर्तन केले आहे. मार्गी- वक्री, उदय- अस्त होताना शनीचा प्रभाव अनेक राशींवर पडत आहेच. आता २९ जूनला शनीदेव वक्री झाले आहेत आणि पुढील चार महिन्यांनी शनी महाराज मार्गी होणार आहेत. शनी मार्गी होताच काही राशींवरील साडेसातीचा प्रभाव कमी होणार आहे. या राशी कोणत्या हे पाहूया.
वक्री झालेले शनी महाराज कधी होणार मार्गी?
शनी महाराज २९ जूनला वक्री झाले होते व आता ते वक्र चाल करत कुंभ राशीत भ्रमण करत आहेत. शनी चार महिन्यांनी म्हणजेच १५ नोव्हेंबरला पुन्हा मार्गी होणार आहेत. २९ मार्च २०२५ पर्यंत शनी कुंभेतच स्थित असणार आहे. त्यामुळे शनी मार्गी झाल्यावर सुद्धा त्यांचे मूळ वास्तव्याचे स्थान हे कुंभच असणार आहे. १५ नोव्हेंबरला संध्याकाळी ८ वाजून ७ मिनिटांनी शनी मार्गी होणार आहेत. या कालावधीत काही राशींना महत्त्वपूर्ण फायदे होणार आहेत. ज्योतिषशास्त्रानुसार, या राशींवरील साडेसातीचा प्रभाव आता सौम्य होणार आहे.
‘या’ राशींवरील साडेसातीचा प्रभाव होणार कमी
ज्योतिषशास्रानुसार, शनी जेव्हा एका राशीतून दुसऱ्या राशीत प्रवेश करतो, तेव्हा त्याला साधारणत: अडीच वर्षाचा कालावधी लागतो. जेव्हा शनि तुमच्या चंद्र राशीपासून १२ व्या घरात प्रवेश करतो तेव्हा तुमची साडेसाती सुरू होते आणि जेव्हा शनी तुमच्या चंद्र राशीपासून दुसरे घर सोडून तिसऱ्या घरात प्रवेश करतो तेव्हा तुमची साडेसाती संपते.
सध्या मकर राशीवर शनीच्या साडेसातीचा सर्वाधिक प्रभाव आहे. मीन राशीचा सुद्धा शनीच्या साडेसातीचा दुसरा टप्पा सुरु आहे, तर कुंभ राशीत साडेसातीचा दुसरा टप्पा सुरु आहे. शनी नोव्हेंबरमध्ये मार्गी झाल्यापासूनच मकर राशीच्या मंडळींवरील शनीच्या साडेसातीचा प्रभाव कमी होऊ लागेल व शनीने मीन राशीत प्रवेश करताच मकर राशीची साडेसाती संपुष्टात येईल. यानंतर मेष राशीत साडेसातीचा प्रभाव सुरु होईल.
