भारतीय रेल्वेत नोकरी करू इच्छिणाऱ्या पदवीधर उमेदवारांसाठी महत्त्वाची संधी उपलब्ध झाली आहे. रेल्वे भरती मंडळाने (आरआरबी) केंद्रीकृत रोजगार अधिसूचना क्रमांक ०६/२०२६ अंतर्गत अ-तांत्रिक लोकप्रिय श्रेणी पदवीधर स्तरावरील साडेतीन हजारांवर रिक्त पदांसाठी भरती जाहीर केली आहे.
या भरतीमध्ये व्यावसायिक सेवा, रेल्वे परिचालन, लेखा आणि प्रशासकीय विभागांतील पदांचा समावेश आहे. इच्छुक व पात्र उमेदवारांना ६ नोव्हेंबरपर्यंत ऑनलाइन अर्ज करता येणार असल्याचे अधिसूचनेत नमूद आहे.
या भरतीअंतर्गत चार प्रकारच्या पदांसाठी उमेदवारांची निवड केली जाणार आहे. त्यामध्ये गुड्स ट्रेन मॅनेजर, सीनियर क्लर्क कम टायपिस्ट, ज्युनियर अकाउंट्स असिस्टंट कम टायपिस्ट आणि चीफ कमर्शियल कम टिकीट सुपरवायझर या पदांचा समावेश आहे. एकूण ३,५४८ पदांपैकी गुड्स ट्रेन मॅनेजर पदासाठी सर्वाधिक २,७५० जागा उपलब्ध आहेत. सीनियर क्लर्क कम टायपिस्ट पदासाठी ३७१, ज्युनियर अकाउंट्स असिस्टंट कम टायपिस्ट पदासाठी ३००, तर चीफ कमर्शियल कम टिकीट सुपरवायझर पदासाठी १२७ जागा निश्चित करण्यात आल्या आहेत. या पदांनुसार रेल्वेच्या विविध विभागांत काम करण्याची संधी उमेदवारांना मिळणार आहे.
पदानुसार वेतनश्रेणी
सातव्या केंद्रीय वेतन आयोगानुसार विविध पदांसाठी वेतन निश्चित करण्यात आले आहे. चीफ कमर्शियल कम टिकीट सुपरवायझर या पदासाठी पे लेव्हल ६ अंतर्गत सुरुवातीचे मूळ वेतन प्रतिमहिना ३५ हजार ४०० रुपये आहे. तर गुड्स ट्रेन मॅनेजर, सीनियर क्लर्क कम टायपिस्ट आणि ज्युनियर अकाउंट्स असिस्टंट कम टायपिस्ट या पदांसाठी पे लेव्हल ५ नुसार सुरुवातीचे मूळ वेतन प्रतिमहिना २९ हजार २०० रुपये असणार आहे. याशिवाय नियमानुसार लागू असलेले भत्ते आणि इतर सेवा लाभ मिळतील.
अर्जाची अंतिम तारीख ६ नोव्हेंबर
रेल्वे भरतीसाठी ऑनलाइन अर्ज प्रक्रिया ८ ऑक्टोबरपासून सुरू झाली आहे. उमेदवारांना ६ नोव्हेंबर २०२६ रोजी रात्री ११ वाजून ५९ मिनिटांपर्यंत अर्ज सादर करता येणार आहे. परीक्षा शुल्क भरण्याची अंतिम तारीख ८ नोव्हेंबर २०२६ असून, अर्जातील त्रुटी दुरुस्त करण्यासाठी ९ ते १८ नोव्हेंबरदरम्यान सुधारणा सुविधा उपलब्ध असेल. उमेदवारांनी अर्ज भरण्यापूर्वी संबंधित पदासाठी आवश्यक शैक्षणिक पात्रता, वयोमर्यादा आणि इतर अटी तपासणे आवश्यक आहे. अर्जातील माहिती अचूक भरावी आणि विहित मुदतीत अर्ज प्रक्रिया पूर्ण करावी, असे आवाहन करण्यात आले आहे.
पदवी आवश्यक; वयोमर्यादा १८ ते ३३ वर्षे
भरतीसाठी उमेदवाराकडे मान्यताप्राप्त विद्यापीठाची पदवी किंवा समतुल्य पात्रता असणे आवश्यक आहे. १ जानेवारी २०२७ रोजी उमेदवाराचे वय १८ ते ३३ वर्षांच्या दरम्यान असावे. पात्र आरक्षित प्रवर्गांना शासनाच्या आणि भरती अधिसूचनेतील नियमानुसार वयोमर्यादेत सवलत लागू असेल. पदनिहाय पात्रतेच्या अटी आणि आवश्यक कागदपत्रांची माहिती अधिकृत अधिसूचनेत तपासणे आवश्यक आहे.
दोन टप्प्यांत संगणक आधारित परीक्षा
निवड प्रक्रियेत पहिल्या टप्प्यातील संगणक-आधारित चाचणी (सीबीटी-१) आणि दुसऱ्या टप्प्यातील संगणक-आधारित चाचणी (सीबीटी-२) यांचा समावेश असेल. त्यानंतर नियमानुसार कागदपत्रांची पडताळणी आणि वैद्यकीय तपासणी केली जाईल. उमेदवारांची निवड गुणवत्तेच्या आधारे आणि संबंधित पदासाठी निश्चित केलेल्या पात्रता निकषांनुसार होणार आहे. भरती प्रक्रियेत लागू आरक्षणाचे नियम आणि वयोमर्यादेतील सवलतींची अंमलबजावणी केली जाईल. तसेच पात्र दिव्यांग उमेदवारांसाठी नियमानुसार लेखनिकाची सुविधा आणि अतिरिक्त वेळ देण्याची तरतूद आहे.
टायपिंग चाचणीबाबत महत्त्वाची तरतूद
अधिसूचनेनुसार ज्युनियर अकाउंट्स असिस्टंट कम टायपिस्ट आणि सीनियर क्लर्क कम टायपिस्ट या पदांसाठी संगणक-आधारित टायपिंग कौशल्य चाचणी रद्द करण्यात आल्याचे नमूद करण्यात आले आहे. तथापि, या पदांसाठी नियुक्तीनंतर संगणक आणि टायपिंग कौशल्यांची पडताळणी करण्याबाबत अधिसूचनेतील अटी उमेदवारांनी काळजीपूर्वक तपासाव्यात. भरतीसंबंधी सविस्तर माहिती, पदनिहाय रिक्त जागा, पात्रता निकष, परीक्षा पद्धती आणि अर्ज प्रक्रियेचे तपशील रेल्वे भरती मंडळाच्या अधिकृत संकेतस्थळावर उपलब्ध होऊ शकतात. उमेदवारांनी https://rrb.indianrailways.gov.in या संकेतस्थळाला किंवा ऑनलाइन अर्जासाठी https://rrbapply.gov.in या पोर्टलला भेट द्यावी, असे आवाहन करण्यात आले आहे.
